Tirupati | తిరుపతిలో భారీ అగ్నిప్రమాదం.. గోవిందరాజు స్వామి ఆలయం సమీపంలో మంటలు..

2

అక్షరటుడే, తిరుమల: Tirupati : తిరుపతిలో అర్ధరాత్రి సమయంలో అగ్నిప్రమాదం జరిగింది. గోవిందరాజు స్వామి ఆలయం (Govindaraju Swamy temple) సమీపంలో ఉన్న చలువ పందిళ్ల (Chaluva Pandilla) ప్రాంతంలో ఒక్కసారిగా శార్ట్ సర్క్యూట్‌ కారణంగా ప్రమాదం సంభవించింది.

మంటలు ఒక్కసారిగా ఎగసిపడటంతో పందిళ్లు పూర్తిగా దగ్ధమయ్యాయి. ప్రమాదాన్ని గమనించిన భక్తులు ఒక్కసారిగా భయంతో పరుగులు తీశారు. కొద్ది క్షణాల్లోనే పరిసర ప్రాంతమంతా పొగతో కమ్ముకుపోయింది.

Tirupati : భక్తులలో ఆందోళన..

ఈ ఘటన చోటుచేసుకున్న సమయంలో ఆలయానికి సమీపంలో ఉన్న స్వామివారి దర్శనానికి వచ్చిన భక్తుల సంఖ్య ఎక్కువగా ఉండటంతో పరిస్థితి గందరగోళంగా మారింది. మంటలు చలువ పందిళ్లకు అంటుకోవడంతో పాటు, పక్కనే ఉన్న ఇతర తాత్కాలిక కట్టడాలకు కూడా వ్యాపించాయి. పొగ వ‌ల‌న‌ భక్తులు ఇబ్బందులు పడ్డారు.

అగ్నిమాపక సిబ్బంది సమయానికి చేరుకుని, మూడు ఫైర్ ఇంజిన్స్ తో సహాయక చర్యలు చేపట్టారు. సుమారు రెండు గంటల పాటు శ్రమించి మంటలను పూర్తిగా అదుపులోకి తీసుకొచ్చారు.

అగ్ని ప్రమాదంలో చలువ పందిళ్లు, డెకరేషన్ సామగ్రి, ప్లాస్టిక్ కవర్లు, టెంట్లు, విద్యుత్ సరఫరా వ్యవస్థ పూర్తిగా దగ్ధమయ్యాయి. ప్రాథమిక అంచనాల ప్రకారం లక్షల రూపాయల ఆస్తి నష్టం జరిగినట్లు అధికారులు తెలిపారు.

ఈ ఘటనలో ఎలాంటి ప్రాణ నష్టం సంభవించలేదు. గాయాలైన భక్తులను దగ్గరలో ఉన్న స్థానిక ఆసుపత్రికి తరలించి చికిత్స అందిస్తున్నారు. ప్రమాదం అనంతరం తిరుమల తిరుపతి దేవస్థానం (టీటీడీ)(Tirumala Tirupati Devasthanams) అధికారులు, పోలీసులు సంఘటనా స్థలానికి చేరుకుని పరిస్థితిని సమీక్షించారు. భక్తులకు ఆటంకం కలగకుండా వెంటనే ప్రత్యామ్నాయ ఏర్పాట్లు చేపట్టారు. ఇటువంటి సంఘటనలు మరల చోటుచేసుకోకుండా భద్రతా ఏర్పాట్లను మరింత బలోపేతం చేయాలని నిర్ణయించారు. ఈ ప్రమాదానికి శార్ట్ సర్క్యూట్ కారణమని అధికారులు ప్రాథమికంగా గుర్తించారు. పూర్తి వివరాల కోసం విచారణ జరుగుతోంది.