అక్షరటుడే, వెబ్​డెస్క్ : Local Body Elections | స్థానిక సంస్థల ఎన్నిక​ల నిర్వహణకు ప్రభుత్వం సిద్ధమైంది. ఈ మేరకు రాష్ట్ర ఎన్నికల సంఘం ఎన్నికల నిర్వహణ ప్రక్రియను వేగవంతం చేసింది.

రాష్ట్రంలో స్థానిక ఎన్నికలపై మంత్రి కోమటిరెడ్డి వెంకట్ రెడ్డి (Minister Komatireddy Venkat Reddy) కీలక వ్యాఖ్యలు చేశారు. అసెంబ్లీ సమావేశాల సందర్భంగా ఆదివారం ఆయన మీడియా చిట్​చాట్​లో మాట్లాడారు. సెప్టెంబర్​ 10 తర్వాత స్థానిక ఎన్నికల నోటిఫికేషన్ (Election Notification) విడుదల అవుతుందని ఆయన తెలిపారు. సెప్టెంబర్​ నెలాఖరులోగా స్థానిక సంస్థల ఎన్నికల ప్రక్రియ పూర్తి చేస్తామన్నారు. మొదట ఎంపీటీసీ, జెడ్పీటీసీ ఎన్నికలు నిర్వహించి, తర్వాత సర్పంచ్​ ఎలక్షన్లు పెడుతామన్నారు.

Local Body Elections | ఎన్నికల సంఘం అడుగులు

స్థానిక ఎన్నికల నిర్వహణకు ఎన్నికల సంఘం (SEC) అడుగులు వేస్తోంది. ఇప్పటికే పంచాయతీ ఓటర్ల జాబితా కోసం నోటిఫికేషన్​ విడుదల చేసిన రాష్ట్ర ఎన్నికల సంఘం.. శనివారం ఎంపీటీసీ, జెడ్పీటీసీ ఓటరు జాబితా కోసం ఉత్తర్వులు జారీ చేసింది. సెప్టెంబర్​ 6న ఓటరు జాబితా ముసాయిదా ప్రతి విడుదల చేయాలని, అనంతరం అభ్యంతరాలు స్వీకరించి అదే నెల 10న తుది ఓటరు జాబితా, పోలింగ్​ స్టేషన్ల వివరాలు వెల్లడించాలని ఆదేశించింది.

Local Body Elections | ఆశావహుల్లో ఉత్కంఠ

రాష్ట్రంలో పంచాయతీ పాలకవర్గాల పదవీకాలం పూర్తయి ఏడాదిన్నర అవుతోంది. అప్పటి నుంచి గ్రామాలు ప్రత్యేకాధికారుల పాలనలో ఉన్నాయి. మరోవైపు ఎంపీటీసీ, జెడ్పీటీసీ టర్మ్​ అయిపోయి కూడా ఏడాది దాటింది. దీంతో గ్రామాల్లో పాలన అస్తవ్యస్తం అయింది. ఈ క్రమంలో స్థానిక ఎన్నికల కోసం ప్రజలతో పాటు, నాయకులు ఎంతో ఉత్కంఠతో ఎదురు చూస్తున్నారు.

స్థానిక ఎన్నికల్లో పోటీ చేయడానికి పలువురు ప్రయత్నిస్తున్నారు. అయితే ఎన్నికల తేదిపై స్పష్టత లేకపోవడంతో ఏ రిజర్వేషన్​ (Reservations) ఖరారు అవుతుందో తెలియక వారు ఆందోళన చెందుతున్నారు. తాజాగా మంత్రి ఈ నెలలోనే ఎన్నికలు నిర్వహిస్తామని ప్రకటించడంతో ఆశావహులు హర్షం వ్యక్తం చేస్తున్నారు. అయితే రిజర్వేషన్లు ఖరారు అయితే పోటీలో దిగే అభ్యర్థులు ప్రయత్నాలు ప్రారంభించే అవకాశం ఉంది.