అక్షరటుడే, హైదరాబాద్: తెలంగాణ రాష్ట్రంలో స్థానిక సంస్థల ఎన్నికల నిర్వహణకు రంగం సిద్ధమైంది. ఎంపీటీసీ (MPTC), జడ్పీటీసీ (ZPTC), సర్పంచి (Sarpanch) స్థానాల ఎన్నికలకు సంబంధించి రాష్ట్ర ఎన్నికల సంఘం సోమవారం (సెప్టెంబరు 29) షెడ్యూల్ విడుదల చేయనుంది.
షెడ్యూల్ ప్రకటించగానే రాష్ట్రంలో ఎన్నికల కోడ్ (Election Code) అమల్లోకి వస్తుంది. ఇక ఎలక్షన్ విషయానికి వస్తే.. మొదట ఎంపీటీసీ, జడ్పీటీసీ స్థానాలకు నిర్వహించనున్నారు. ఆ తర్వాత సర్పంచి ఎన్నికలు ఉంటాయి.
రాష్ట్రంలోని ఎంపీటీసీ, జడ్పీటీసీ, సర్పంచి, వార్డు సభ్యులు, జడ్పీ ఛైర్మన్ పదవుల రిజర్వేషన్ల గెజిట్ను తెలంగాణ సర్కారు ఆదివారం రాత్రి రాష్ట్ర ఎన్నికల సంఘానికి నివేదించింది.
Local body election schedule | హైకోర్టులో రిజర్వేషన్ల అంశం
ఈ గెజిట్ను పరిశీలించిన ఈసీ.. తదుపరి ఎలక్షన్ ప్రణాళికను సిద్ధం చేసింది. కాగా, రిజర్వేషన్ల విషయం హైకోర్టులో ఉండటంతో రాష్ట్ర ఎలక్షన్ కమిషన్కు రాష్ట్ర అత్యున్నత న్యాయస్థానం నోటీసులు జారీ చేసింది.
ఈ నేపథ్యంలో న్యాయపరమైన చిక్కులపై ఈసీ ముందే చర్చించినట్లు సమాచారం. అడ్వొకేట్ జనరల్ సలహా సైతం తీసుకున్నట్లు సమాచారం.
హైకోర్టు విచారణను అక్టోబరు 8కి వాయిదా వేసింది. ఈ క్రమంలో ఆ తర్వాతే మొదటి ఎలక్షన్ నోటిఫికేషన్ విడుదల చేసే విధంగా ప్రణాళిక రూపొందించినట్లు తెలుస్తోంది.
దశల వారీగా ఎన్నికలు జరిపేలా ప్రణాళిక రూపొందినట్లు సమాచారం. మొదట ఎంపీటీసీ, జడ్పీటీసీ ఎలక్షన్స్ ను రెండు దశల్లో నిర్వహించే అవకాశం ఉన్నట్లు తెలుస్తోంది.
ఆ తర్వాత సర్పంచి ఎలక్షన్స్ సైతం కొన్ని జిల్లాల్లో రెండు, మరికొన్ని చోట్ల మూడు దశల్లో జరిపే అవకాశం ఉంది. హైకోర్టు నుంచి ఆటంకాలు రాకపోతే నవంబరు 10 – 15 లోపు జడ్పీటీసీ, ఎంపీటీసీ, సర్పంచి స్థానాలకు ఎన్నికలు పూర్తి కానున్నాయి.
