అక్షరటుడే, వెబ్డెస్క్ : Putin | రష్యా అధ్యక్షుడు పుతిన్ కీలక వ్యాఖ్యలు చేశారు. భారత సినిమాలంటే తనకు ఎంతో ఇష్టమని ఆయన పేర్కొన్నారు. ఇటీవల ట్రంప్ భారత్ సహా విదేశీ సినిమాలపై వంద శాతం సుంకాలు విధించిన విషయం తెలిసిందే. ఈ క్రమంలో పుతిన్(Putin) భారత సినిమాలంటే ఇష్టమని వ్యాఖ్యలు చేయడం గమనార్హం.
భారత సినిమా(Indian Films)లకు రష్యాలో చాలా పాపులారిటీ ఉందని పుతిన్ పేర్కొన్నారు. సోచిలో జరిగిన ఓ కార్యక్రమంలో ఆయన మాట్లాడారు. తమకు ఇండియన్ మూవీస్ అంటే చాలా ప్రేమ అన్నారు. భారత సినిమాలను 24 గంటలు ప్రసారం చేయడానికి ప్రత్యేకంగా ఓ ఛానల్ను నిర్వహిస్తున్నట్లు ఆయన పేర్కొన్నారు. భారత్–రష్యా మధ్య రాజకీయ, దౌత్య సంబంధాలు సంబంధాలతో పాటు, సాంస్కృతిక, మానవీయ బంధం కూడా బలంగా ఉందన్నారు.
Putin | సోవియెట్ కాలం నుంచే..
సోవియెట్ యూనియన్ విచ్ఛిన్నం కాకముందు నుంచే అక్కడ భారత సినిమాలకు ఆదరణ ఉంది. రాజ్కపూర్, మిథున్ చక్రవర్తి వంటి బాలీవుడ్ స్టార్ల సినిమాలకు అక్కడ బాగా క్రేజ్ ఉండేది. ఇప్పటికి అక్కడ వారి పేర్లు వినిపిస్తాయి. నాటో, సోవియెట్ యూనియన్ మధ్య ప్రచ్ఛన్న యుద్ధం జరిగిన సమయంలో రష్యా పాశ్చాత్య సినిమాలపై నిషేధం విధించింది. అప్పటి నుంచి అక్కడ బాలీవుడ్ చిత్రాలకు క్రేజ్ పెరిగింది.
Putin | మిథున్ చక్రవర్తికి ఫ్యాన్స్
బాలీవుడ్ స్టార్ మిథున్ చక్రవర్తి(Mithun Chakravarthy)కి రష్యాలో చాలా మంది ఫ్యాన్స్ ఉన్నారు. ఆయన 1982లో నటించిన ‘డిస్కో డ్యాన్సర్’ మూవీ సోవియట్ యూనియన్లో సూపర్ హిట్ అయింది. ఆ చిత్రాన్ని చూసేందుకు జనాలు బారులు తీరారంటే పరిస్థితి అర్థం చేసుకోవచ్చు. ఆ సినిమాలో హిట్ సాంగ్ అయిన ‘జిమ్మీ జిమ్మీ ఆజా ఆజా’ అనే పాట రష్యాలో మార్మోగిపోయింది.
