అక్షరటుడే, వెబ్డెస్క్ : ORR | హైదరాబాద్ (Hyderabad) నగరంలో నాలుగైదు రోజులుగా వర్షాలు బీభత్సం సృష్టిస్తున్నాయి. భారీ వర్షాల (Heavy Rains)తో లోతట్టు ప్రాంతాలు జలమయం అయి ప్రజలు అనేక ఇబ్బందులు పడుతున్నారు. రోడ్లపై నీరు చేరి చెరువులను తలపిస్తుండటంతో వాహనదారులు ట్రాఫిక్లో చిక్కుకొని నరకయాతన అనుభవిస్తున్నారు. వరద ఉధృతికి పలు ప్రాంతాల్లో వాహనదారులు కొట్టుకుపోతున్నారు. అయితే తాజాగా ఔటర్ రింగ్ రోడ్డు (ORR) సర్వీస్ రోడ్డు (Service Road)లోకి పెద్ద బండరాళ్లు దూసుకొచ్చాయి.
నార్సింగి- అప్పా (Narsing -Appa) రోడ్డులో బండరాళ్లు విరిగి పడ్డాయి. వర్షాలతో బండరాళ్ల కింద మట్టి జారిపోవడంతో అవి రోడ్డుపైకి దూసుకు వచ్చాయి. రెండు పెద్ద బండరాళ్లు సర్వీస్ రోడ్డుకుపైకి వచ్చాయి. ఆ సమయంలో అక్కడ వాహనాలు లేకపోవడంతో పెద్ద ప్రమాదం తప్పింది. రాళ్లు రోడ్డుపై పడటంతో ఆ మార్గంలో భారీగా ట్రాఫిక్ జామ్ అయింది. దీంతో పోలీసులు ఘటనా స్థలానికి చేరుకొని సహాయక చర్యలు చేపడుతున్నారు. ట్రాఫిక్ను క్లియర్ చేస్తున్నారు. ఆ బండరాళ్లను రోడ్డుపై నుంచి తొలగించడానికి ఏర్పాట్లు చేస్తున్నారు. ఆ మార్గంలో ట్రాఫిక్ జామ్ కావడంతో వాహనదారులు ప్రత్యామ్నాయ మార్గాలను ఎంచుకోవాలని ట్రాఫిక్ పోలీసులు వాహనదారులకు సూచించారు.
మరోవైపు నిత్యం వర్షాలు కురుస్తుండటంతో బేగంబజార్లో ఓ పురాతన భవనం కుప్పకూలింది. ఆ సమయంలో ఎవరూ లేకపోవడంతో ప్రమాదం తప్పింది. హిమాయత్ సాగర్ (Himayat Sagar) గేట్లు ఎత్తడంతో మూసీ నది ఉధృతంగా పారుతోంది. దీంతో నది పరీవాహక ప్రాంత ప్రజలు అప్రమత్తంగా ఉండాలని అధికారులు సూచించారు.
