అక్షరటుడే, వెబ్​డెస్క్ : KTR | మాజీ మంత్రి, బీఆర్​ఎస్​ వర్కింగ్​ ప్రెసిడెంట్​ కేటీఆర్ (KTR)​ ఐదు వేల మందికి కేసీఆర్​ కిట్లను పంపిణీ చేశారు. జులై 24న కేటీఆర్​ పుట్టిన రోజు పురస్కరించుకొని గిఫ్ట్​ ఏ స్మైల్ కార్యక్రమంలో (Gift a Smile Program) భాగంగా మంగళవారం కిట్లు పంపిణీ చేశారు. ఈ సందర్భంగా ఆయన మాట్లాడుతూ.. కేసీఆర్​ మీద కోపంతో కాంగ్రెస్​ ప్రభుత్వం (Congress Government) అధికారంలోకి వచ్చాక కేసీఆర్​ కిట్లు పంపిణీ చేయడం ఆపేసిందన్నారు.

KTR | మాతాశిశు మరణాలు తగ్గాయి..

గతంలో ప్రభుత్వ ఆస్పత్రులకు రావాలంటే ప్రజలు భయపడేవారని కేటీఆర్​ అన్నారు. కేసీఆర్​ కిట్​ (KCR Kit) అమలు చేశాక.. ప్రసవాల కోసం చాలా మంది సర్కార్​ దవాఖానాకు వచ్చారన్నారు. ఈ పథకంలో రాష్ట్రంలో మాతాశిశు మరణాలు తగ్గాయని తెలిపారు. అయితే కేసీఆర్​ మీద కోపంతో ఈ పథకాన్ని ఆపేయడంతో బాలింతలు ఇబ్బంది పడుతున్నట్లు తన దృష్టికి వచ్చిందన్నారు. దీంతో ఈ ఏడాది 5 వేల కుటుంబాలకు కిట్లు పంపిణీ చేయాలని నిర్ణయించినట్లు చెప్పారు.

KTR | కేసీఆర్​ కిట్​ పథకం

బీఆర్​ఎస్ హయాంలో ప్రభుత్వ ఆస్పత్రుల్లో (Government Hospitals) ప్రసవించిన మహిళలకు కేసీఆర్​ కిట్​ అందించేవారు. ఇందులో చిన్నారులకు అవసరమైన సామగ్రి ఉండేది. ఇందులో శిశువు కోసం పౌడర్​, నూనె, సబ్బులు, దుస్తులు, దోమతెర బాలింతకు చీరలు తదితర వస్తువులు ఉండేది. అంతేగాకుండా ఆడపిల్ల పుడితే రూ.13 వేలు, అబ్బాయి పుడితే రూ.12 వేలు తల్లుల ఖాతాల్లో జమ చేసేవారు. అయితే బీఆర్​ఎస్​ హయాంలోనే డబ్బులు జమ చేయడం ఆపేశారు. కానీ కిట్లు పంపిణీ చేసేవారు. కాంగ్రెస్​ అధికారంలోకి వచ్చాక కేసీఆర్​ కిట్లు ఇవ్వడం లేదు.