Kothagudem Mayor | కొత్తగూడెం మేయర్​ పదవిపై కాంగ్రెస్​ కీలక నిర్ణయం.. బీఆర్​ఎస్​కు చెక్​!

అక్షరటుడే, వెబ్​డెస్క్ : Kothagudem Mayor | కొత్తగూడెం కార్పొరేషన్​లో హంగ్​ ఏర్పడటంతో మేయర్​, డిప్యూటీ మేయర్​ ఎన్నికపై ఉత్కంఠ నెలకొంది. ఈ క్రమంలో కాంగ్రెస్​, సీపీఐ మేయర్​ పదవిని పంచుకోవాలని నిర్ణయించినట్లు సమాచారం.

కొత్తగూడెంలో మొత్తం 60 డివిజన్ల ఉన్నాయి. సీపీఐ (CPI), కాంగ్రెస్‌ పార్టీలు చెరో 22 స్థానాల్లో విజయం సాధించాయి. బీఆర్ఎస్ 8, సీపీఎం 1, బీజేపీ 1, స్వతంత్రులు 6 స్థానాల్లో గెలుపొందారు. ఏ పార్టీకి స్పష్టమైన మెజారిటీ రాకపోవడంతో మేయర్​ పదవిపై ఉత్కంఠ నెలకొంది. 31 సీట్లు ఉంటే మేయర్​ పదవి దక్కించుకోవచ్చు. ఈ క్రమంలో తాము సీపీఐకి మద్దతు ఇస్తామని కేటీఆర్ (KTR)​ ఇటీవల ప్రకటించిన విషయం తెలిసిందే. అయితే బీఆర్​ఎస్​కు చెక్​ పెట్టేందుకు కాంగ్రెస్​ కీలక నిర్ణయం తీసుకుంది.

Kothagudem Mayor | చెరో రెండున్నరేళ్లు

సీఎం రేవంత్​రెడ్డి (CM Revanth Reddy) ఆదివారం ఉదయం సీపీఐ నాయకులు పల్లా వెంకట్ రెడ్డి, ఈటీ నర్సింహతో సమావేశం అయ్యారు. పీసీసీ అధ్యక్షుడు మహేష్ కుమార్ గౌడ్ సైతం పాల్గొన్నారు. కొత్తగూడెం (Kothagudem) కార్పొరేషన్​పై ఆయన వారితో చర్చించారు. చెరో రెండున్నరేళ్లు మేయర్​ పదవి తీసుకోవడానికి ఇరు పార్టీలు అంగీకరించినట్లు సమాచారం. ముందుగా సీపీఐ మేయర్​ పీఠంపై కూర్చొనున్నట్లు తెలిసింది. అనంతరం కాంగ్రెస్​కు అవకాశం ఇవ్వనున్నట్లు సమాచారం. మేయర్​ పదవి పొందిన అభ్యర్థులు రెండున్నరేళ్ల తర్వాత రాజీనామా చేయకపోతే ఏమి చేయలేని పరిస్థితి ఉంటుంది. నాలుగేళ్ల వరకు అవిశ్వాసం ప్రవేశ పెట్టే అవకాశం లేదు. దీంతో కాంగ్రెస్​కు మొదట అవకాశం ఇస్తే తమకు అధికారం సాధ్యం కాదని సీపీఐ భావించినట్లు సమాచారం. మేయర్​ పీఠం ఎవరు దక్కించుకుంటారనేది సోమవారం తేలనుంది.

Kothagudem Mayor | కాంగ్రెస్​లో చేరిన కౌన్సిలర్లు

మంత్రి పొంగులేటి శ్రీనివాస్​రెడ్డి (Ponguleti Srinivas Reddy) సమక్షంలో ఆదివారం ఐదుగురు స్వతంత్ర కార్పొరేటర్లు కాంగ్రెస్​లో చేరారు. సీపీఎంతో కలుపుకొని కాంగ్రెస్​ బలం 28కి చేరింది. మెజారిటీకి మరో 3 సీట్లు తక్కువగా ఉండటంతో సీపీఐతో కలవడానికి కాంగ్రెస్​ సిద్ధమైంది. ఇప్పటికే ప్రభుత్వం ఆ రెండు పార్టీలు పొత్తులో ఉన్న విషయం తెలిసిందే. మరోవైపు తాము సీపీఐకి మద్దతు తెలపకపోతే బీఆర్​ఎస్​ సాయంతో ఆ పార్టీ మేయర్​ పీఠాన్ని దక్కించుకునే అవకాశం ఉందని హస్తం పార్టీ భావిస్తోంది.