అక్షరటుడే, వెబ్డెస్క్ : Komatireddy Rajagopal Challenge | తెలంగాణలో జరిగిన మున్సిపల్ ఎన్నికల్లో కాంగ్రెస్ మంచి ఫలితాలు సాధించి సంబరాల్లో మునిగిపోయింది. ఈ సమయంలోనే మునుగోడు ఎమ్మెల్యే (Munugode MLA) కోమటిరెడ్డి రాజగోపాల్ రెడ్డి చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి.
తనకు మంత్రి పదవి ఇవ్వాలని, లేదంటే నేరుగా ముఖ్యమంత్రి కుర్చీ లక్ష్యంగా ముందుకు వెళ్తానని హెచ్చరించడం పార్టీలో కలకలం రేపింది. గతంలో కూడా పలుమార్లు ఇలాంటి వ్యాఖ్యలు చేసిన రాజగోపాల్ రెడ్డి, తనను పార్టీలోకి తిరిగి చేర్చుకున్నప్పుడు మంత్రి పదవి హామీ ఇచ్చారని చెబుతూ పార్టీ నాయకత్వంపై నిరంతరం ఒత్తిడి తెస్తున్నారు.
Komatireddy Rajagopal Challenge | తలనొప్పిగా మారిన రాజగోపాల్ రెడ్డి..
ప్రతిపక్షంలో ఉన్న సమయంలో కాంగ్రెస్ (Congress)కు రాజీనామా చేసి బీజేపీలో చేరిన ఆయన, 2023 ఎన్నికల ముందు మళ్లీ కాంగ్రెస్లోకి వచ్చారు. ఆ సమయంలోనే మంత్రి పదవి హామీ ఇచ్చారనే వాదనను ఇప్పటికీ ప్రస్తావిస్తూ వస్తున్నారు. ఇదే సమయంలో ఆయన సోదరుడు కోమటిరెడ్డి వెంకట్ రెడ్డి ప్రస్తుతం మంత్రిగా కొనసాగుతుండటంతో, ఒకే కుటుంబం నుంచి ఇద్దరికి పదవులు ఇవ్వడం సాధ్యం కాదనే అభిప్రాయం పార్టీలో ఉంది. అయినప్పటికీ రాజగోపాల్ రెడ్డి మాత్రం మంత్రి పదవి తన హక్కేనని స్పష్టం చేస్తున్నారు. మంత్రి పదవి సాధించాలనే లక్ష్యంతో ప్రభుత్వంపై విమర్శలు చేయడం ఆయనకు అలవాటైందనే విమర్శలు వినిపిస్తున్నాయి. ముఖ్యంగా ముఖ్యమంత్రి రేవంత్ రెడ్డి (CM Revanth Reddy)ను లక్ష్యంగా చేసుకుని తరచూ వ్యాఖ్యలు చేస్తూ ఉంటున్నారు. పార్టీ రాష్ట్ర నాయకత్వం ఒకటి రెండు సార్లు పిలిచి మాట్లాడినా ఆయన తన ధోరణి మార్చుకోలేదనే అభిప్రాయం వ్యక్తమవుతోంది. మున్సిపల్ ఎన్నికల ఫలితాలపై స్పందించిన సందర్భంలో కూడా మంత్రి పదవి అంశాన్ని మళ్లీ ప్రస్తావించడం పార్టీ వర్గాల్లో అసంతృప్తిని పెంచింది.
తనకు ఇచ్చిన మాట ప్రకారం మంత్రి పదవి ఇవ్వాలని, లేకపోతే ఇకపై అడగడం లేదని, సరైన సమయం వచ్చినప్పుడు నేరుగా సీఎం సీటులో కూర్చుంటానని రాజగోపాల్ రెడ్డి వ్యాఖ్యానించారు. గతంలో ముఖ్యమంత్రి పదవిపై రేవంత్ రెడ్డి చేసిన వ్యాఖ్యలను కూడా ఆయన తీవ్రంగా విమర్శించారు. పార్టీని వ్యక్తిగత సామ్రాజ్యంగా మార్చే ప్రయత్నాలు జరుగుతున్నాయంటూ సామాజిక మాధ్యమాల్లో పలు పోస్టులు పెట్టారు. రాజగోపాల్ రెడ్డి వైఖరి రాష్ట్ర కాంగ్రెస్ నాయకత్వానికి తలనొప్పిగా మారిందనే అభిప్రాయం వ్యక్తమవుతోంది. ఒకవైపు ఆయన, మరోవైపు ఇతర అసంతృప్త నేతల వ్యాఖ్యలు ప్రత్యర్థి పార్టీలకు ఆయుధాలుగా మారుతున్నాయని పార్టీ వర్గాలు భావిస్తున్నాయి.
