అక్షరటుడే, వెబ్డెస్క్ : Ponnam Prabhakar | జూబ్లీహిల్స్ ఎన్నికల ప్రచారంలో కాంగ్రెస్ దూసుకుపోతుంది. మంత్రులు నియోజకవర్గంలోని డివిజన్లలో పర్యటిస్తున్నారు. తమ అభ్యర్థి నవీన్ యాదవ్ను గెలిపించాలని ప్రజలను కోరుతున్నారు.
యూసుఫ్గూడ డివిజన్లో మంత్రులు పొన్నం ప్రభాకర్, ఉత్తమ్ కుమార్ రెడ్డి (Uttam Kumar Reddy) గురువారం ఉదయం ప్రచారం చేశారు. ఈ సందర్భంగా మంత్రి పొన్నం మాట్లాడుతూ.. జూబ్లీహిల్స్ ఉపఎన్నికల కోసం కిషన్ రెడ్డి (Kishan Reddy), కేసీఆర్ (KCR) కలిసి డ్రామాలు ఆడుతున్నారని విమర్శించారు. 12 ఏళ్లుగా జూబ్లీహిల్స్ నియోజకవర్గానికి కేంద్రం నుంచి ఏం తెచ్చారో కేంద్ర మంత్రి కిషన్ రెడ్డి చెప్పాలని ప్రశ్నించారు. ఆయన పార్లమెంట్ నియోజకవర్గం పరిధిలో ఉన్న జూబ్లీహిల్స్ అభివృద్ధిని పట్టించుకోవడం లేదని విమర్శించారు. బీఆర్ఎస్ పార్టీ గత పదేళ్లలో జూబ్లీహిల్స్కి ఏం చేసిందో చెప్పాలన్నారు.
Ponnam Prabhakar | కాంగ్రెస్పై కుట్రలు
కిషన్ రెడ్డి బీఆర్ఎస్ పార్టీ (BRS Party) మౌత్పీస్గా మారారని పొన్నం ఆరోపించారు. ఈ వ్యాఖ్యలు తాను అనడం లేదని, గోషామహల్ ఎమ్మెల్యే రాజాసింగ్ (Goshamahal MLA Raja Singh) అంటున్నారని చెప్పారు. మొత్తంగా బీజేపీని తీసుకుపోయి బీఆర్ఎస్కు అప్పగించారని విమర్శించారు. కాంగ్రెస్పై గెలవలేక బీఆర్ఎస్, బీజేపీ కలిసి కుట్రలు చేస్తున్నాయని ఆరోపించారు. కాంగ్రెస్ అధికారంలోకి వచ్చాక కొత్త రేషన్ కార్డులు ఇచ్చామన్నారు. పేదలకు రేషన్ దుకాణాల ద్వారా సన్నబియ్యం పంపిణీ చేస్తున్నట్లు చెప్పారు. నవీన్ యాదవ్ను గెలిపించాలని కోరారు. జూబ్లీహిల్స్ను అభివృద్ధి చేస్తామని హామీ ఇచ్చారు. ప్రజలు సమస్యలు పరిష్కరిస్తామన్నారు.
ప్రచారంలో భాగంగా శ్రీ కృష్ణనగర్లో మంత్రి పొన్నం ప్రభాకర్ (Ponnam Prabhakar) దోశ వేశారు. ఈ రోజు తమ అభ్యర్థిని రౌడీ అని ప్రచారం చేస్తున్నారని ఆయన అన్నారు. పదేళ్ల పాలనలో బీఆర్ఎస్ నాయకులు నియంతృత్వంగా ప్రజలను అణచివేశారన్నారు. చదువుకున్న నవీన్యాదవ్ను గెలిపించాలని కోరారు. కార్యక్రమంలో అజారుద్దీన్, మాజీ ఎమ్మెల్యే సంపత్ తదితరులు పాల్గొన్నారు.
