Karimnagar Mayor | కరీంనగర్​ మేయర్​ పీఠంపై మంత్రి పొన్నం కీలక వ్యాఖ్యలు

అక్షరటుడే, వెబ్​డెస్క్ : Karimnagar Mayor | కరీంనగర్ మేయర్​ పదవిపై మంత్రి పొన్నం ప్రభాకర్ (Ponnam Prabhakar)​ కీలక వ్యాఖ్యలు చేశారు. ఒక రాజకీయ పార్టీగా మేయర్​ పీఠం దక్కించుకోవాలని తాము ఆలోచిస్తున్నామన్నారు. ఈ మేరకు స్థానిక నాయకులు వ్యూహాలు రూపొందిస్తున్నట్లు పేర్కొన్నారు.

మహా శివరాత్రి (Maha Shivaratri) సందర్భంగా వేములవాడ (Vemulawada) ఆలయాన్ని మంత్రి పొన్నం దర్శించుకున్నారు. స్వామి వారికి పట్టు వస్త్రాలు సమర్పించారు. ప్రత్యేక పూజలు చేశారు. అనంతరం ఆయన ప్రభుత్వ విప్​ ఆది శ్రీనివాస్​తో కలిసి మీడియాతో మాట్లాడారు. మేయర్​ పీఠంపై ఇటీవల కేంద్ర మంత్రి బండి సంజయ్ (Union Minister Bandi Sanjay)​ చేసిన వ్యాఖ్యలకు ఆయన కౌంటర్​ ఇచ్చారు. కరీంనగర్​లో 66 డివిజన్లు ఉన్నాయని చెప్పారు. స్థానిక ఎమ్మెల్యే, ఎంపీ, మానకొండూరు ఎమ్మెల్యేలతో కలిపి ఓట్ల సంఖ్య 69కి చేరుతుందన్నారు. బీజేపీ 30 సీట్లలో మాత్రమే గెలిచిందన్నారు. మెజారిటీ రాకున్నా తాము మేయర్​ అవుతామని బండి సంజయ్​ ప్రకటించారని విమర్శించారు. ఆయన ఎలా ప్రకటించారో.. మిగతా పార్టీలకు కూడా అలాగే వ్యూహాలు ఉంటాయని చెప్పారు. గతంలో 13 సీట్లు గెలిచిన సమయంలో కూడా కరీంనగర్​లో కాంగ్రెస్​ మేయర్​ పదవి దక్కించుకుందని గుర్తు చేశారు. ఇప్పుడు కూడా అన్ని పార్టీల నాయకులతో సంప్రదించి మేయర్ పీఠం దక్కించుకుంటామన్నారు. దీనికి సీఎం, మంత్రులకు సంబంధం లేదన్నారు.

Karimnagar Mayor | సంజయ్​ ఏమన్నారంటే..

కార్పొరేషన్​ ఎన్నికల్లో బీజేపీ 30 స్థానాల్లో గెలిచింది. కాంగ్రెస్​ 14, బీఆర్​ఎస్​ 9, స్వతంత్ర అభ్యర్థులు 8 మంది, ఫార్వార్డ్​ బ్లాక్​ నుంచి ఇద్దరు గెలిచారు. ఈ క్రమంలో శనివారం బండి సంజయ్​ మీడియాతో మాట్లాడారు. స్వతంత్ర అభ్యర్థులు బీజేపీలో చేరారని ప్రకటించారు. దీంతో మ్యాజిక్​ ఫిగర్​ దాటామన్నారు. బీజేపీ మేయర్ పదవిని దక్కించుకోకుండా కాంగ్రెస్​, బీఆర్​ఎస్​, ఎంఐఎం కుట్ర చేస్తున్నాయని ఆరోపించారు. తమను అడ్డుకుంటే ఆయా పార్టీల నాయకులను రోడ్ల మీద తిరగనివ్వమని హెచ్చరించారు. ఈ వ్యాఖ్యలకు తాజాగా పొన్నం కౌంటర్​ ఇచ్చారు.

Karimnagar Mayor | వారికి మద్దతు ఉంటుంది

ప్రజాస్వామ్య బద్ధంగా కార్పొరేటర్లు మేయర్​ను ఎన్నుకుంటారని మంత్రి పొన్నం ప్రభాకర్​ పేర్కొన్నారు. బీజేపీ గెలిచామని చెప్పుకున్నా.. తాము ఏమైనా అన్నామా అని ప్రశ్నించారు. నిజామాబాద్​లో మెజారిటీ లేకపోవడంతో బీజేపీ ప్రతిపక్షంలో కూర్చుందని, ఇక్కడ కూడా మెజారిటీ రాలేదన్నారు. అయినా జెండా ఎగురవేశామని బండి సంజయ్​ చెప్పినా.. తాము ఏమి అనలేదని ఆయన మాత్రం రోడ్లపై తిరగనివ్వం అని వ్యాఖ్యలు చేయడం సరికాదన్నారు. కరీంనగర్​ అభివృద్ధికి ప్రభుత్వం కృషి చేస్తోందన్నారు. స్థానిక నాయకులు సమన్వయం చేసుకొని మేయర్​ పీఠం కోసం కసరత్తు చేస్తున్నట్లు చెప్పారు. వారికి తమ మద్దతు ఉంటుందన్నారు.