అక్షరటుడే, వెబ్​డెస్క్ : Kaleshwaram Project | కాళేశ్వరం కమిషన్​ నివేదికపై ఆదివారం అసెంబ్లీలో వాడీవేడిగా చర్చ జరిగింది. నీటి పారుదల శాఖ మంత్రి ఉత్తమ్​కుమార్​ రెడ్డి(Uttam Kumar Reddy) చర్చను ప్రారంభించగా.. అధికార పక్షం బీఆర్​ఎస్​పై విరుచుకుపడింది.

బీఆర్​ఎస్​ నుంచి మాజీ మంత్రి హరీశ్​రావు(Harish Rao) కాళేశ్వరం నివేదికపై మాట్లాడారు. అధికార పక్షం నుంచి సీఎం రేవంత్​రెడ్డితో పాటు మంత్రులు మాట్లాడారు. బీజేపీ నుంచి ఏలేటి మహేశ్వర్​రెడ్డి(Yeleti Maheshwar Reddy) మాట్లాడారు. సుమారు తొమ్మిదిన్నర గంటల పాటు సభలో కాళేశ్వరం నివేదికపై చర్చ సాగింది. అర్ధరాత్రి 1:30 గంటల వరకు సభ నిర్వహించడం గమనార్హం. కాళేశ్వరంలో అనేక అక్రమాలు జరిగాయని, విచారణ నిమిత్తం కేసును సీబీఐకి ఇస్తున్నట్లు సీఎం రేవంత్​రెడ్డి(CM Revanth Reddy) ప్రకటించారు. అనంతరం సభను నిరవదికంగా వాయిదా వేశారు.

Kaleshwaram Project | కఠిన చర్యలు

కాళేశ్వరం ప్రాజెక్ట్​ పేరిట నాటి సీఎం కేసీఆర్​ రూ.కోట్లు కొల్లగొట్టారని ముఖ్యమంత్రి రేవంత్​రెడ్డి ఆరోపించారు. రాష్ట్రాన్ని గుదిబండలా మార్చి కేసీఆర్‌ శాశ్వతంగా మరణశాసనం రాశారని సంచలన వ్యాఖ్యలు చేశారు. దోషులుగా తేలినవారిపై కఠిన చర్యలు తీసుకుంటామన్నారు. కాళేశ్వరం పేరుతో దోచుకున్నవాళ్లందరికి శిక్షపడాలని ఆయన పేర్కొన్నారు.

Kaleshwaram Project | రీడిజైన్​ కేసీఆర్​ కుట్రే

ప్రాణహిత –చేవేళ్ల ప్రాజెక్ట్​లో భాగంగా తుమ్మిడిహట్టి వద్ద బ్యారేజీ నిర్మాణానికి కేంద్రం, మహారాష్ట్ర ఒప్పుకున్నాయని సీఎం పేర్కొన్నారు. అయితే అప్పటి సీఎం కేసీఆర్​(KCR) కావాలనే నిర్మాణ స్థలాన్ని మేడిగడ్డకు మార్చారన్నారు. నిపుణుల కమిటీ అక్కడ వద్దని హెచ్చరించినా వినకుండా.. డిజైన్​ మార్చారని ఆరోపించారు. రీడిజైన్‌ పేరుతో కేసీఆర్‌ రూ.కోట్లు కొల్లగొట్టారని ఆరోపించారు. ప్రాజెక్టు నిర్మాణ స్థలం మార్పు కేసీఆర్‌ కుట్రే అని ఆయన విమర్శించారు. రాష్ట్రానికి తీరని ద్రోహం చేసిన కేసీఆర్‌, హరీశ్​ రావును శిక్షించాల్సిన అవసరం ఉందన్నారు.

Kaleshwaram Project | ప్రజలకు హామీ ఇచ్చాం

కాళేశ్వరం పేరిట రూ.లక్ష కోట్లు కొల్లగొట్టిన వారిపై చర్యలు తీసుకుంటామని ప్రజలకు హామీ ఇచ్చినట్లు సీఎం తెలిపారు. అందులో భాగంగానే పీసీ ఘోష్​ కమిషన్(PC Ghosh Commission) ఏర్పాటు చేశామన్నారు. ఎన్​డీఎస్​ఏ, విజిలెన్స్‌, కాగ్​ నివేదికల ఆధారంగా కమిషన్​ విచారణ చేపట్టిందన్నారు. ప్రాణహిత–చేవేళ్ల రీడిజైన్​ పేరిట కేసీఆర్​ చేపట్టిన కాళేశ్వరంతో రాష్ట్ర ఆర్థిక వ్యవస్థ ధ్వంసం అయిందన్నారు. మూడు బ్యారేజీల నిర్మాణంలో విద్యుత్తు వినియోగం 3వేల మెగావాట్ల నుంచి 8,450 మెగావాట్లకు పెరిగిందన్నారు. ప్రాజెక్ట్ నిర్మాణ వ్యయం రూ.38 వేల కోట్ల నుంచి రీడిజైన్​ కారణంగా రూ.1.47లక్షల కోట్లకు చేరిందని సీఎం విమర్శించారు.

Kaleshwaram Project | కేటీఆర్​ విమర్శలు

కాళేశ్వరం కేసును సీబీఐ(CBI)కి అప్పగించడంపై మాజీ మంత్రి, బీఆర్​ఎస్​ వర్కింగ్​ ప్రెసిడెంట్​ కేటీఆర్‌ విమర్శించారు. కాంగ్రెస్​ నేత రాహుల్‌ గాంధీ సీబీఐని ప్రతిపక్షాల నిర్మూలన సెల్‌గా అభివర్ణించారని ఆయన గుర్తు చేశారు. “ఇప్పుడు మీ సీఎం ఏం చేస్తున్నారో మీకైనా తెలుస్తోందా” అంటూ ప్రశ్నించారు. తమపై ఎన్ని కుట్రలు పన్నినా.. రాజకీయంగా, న్యాయపరంగా ఎదుర్కొంటామని ఆయన స్పష్టం చేశారు.