అక్షరటుడే, వెబ్​డెస్క్ : BC Reservations | రాష్ట్రంలో బీసీ రిజర్వేషన్ల సాధన కోసం పోరుబాట పట్టాలని మంత్రి పొన్నం ప్రభాకర్​ (Minister Ponnam Prabhakar) సూచించారు. తెలంగాణ ఉద్యమం కోసం పోరాడిన విధంగా రిజర్వేషన్ల సాధన కోసం బీసీలు అంతా ఏకతాటిపైకి రావాలని ఆయన సూచించారు. గ్రామ గ్రామాన జాయింట్​ యాక్షన్​ కమిటీలు (JAC) ఏర్పాటు చేసుకొని పోరాడాలన్నారు.

విద్య, ఉద్యోగాలు, స్థానిక సంస్థల ఎన్నికల్లో బీసీలకు 42 శాతం రిజర్వేషన్లు కల్పిస్తామని గతంలో కాంగ్రెస్ (Congress)​ హామీ ఇచ్చింది. అధికారంలోకి వచ్చిన అనంతరం కులగణన (Caste Census) చేపట్టి బీసీ రిజర్వేషన్​ బిల్లులను అసెంబ్లీలో ఆమోదించింది. కేంద్ర ప్రభుత్వ ఆమోదం కోసం బిల్లులను ఢిల్లీకి పంపించింది. అయితే కేంద్రం బిల్లులు ఆమోదించకపోవడంతో కాంగ్రెస్​ ఇటీవల ఢిల్లీలో (Delhi) ధర్నా చేసిన విషయం తెలిసిందే. తాజాగా మంత్రి పొన్నం రిజర్వేషన్ల అంశంపై మాట్లాడారు.

BC Reservations | బీసీ విభాగాలను ఏర్పాటు చేసుకోవాలి

ప్రభుత్వ కార్యాలయాల్లో పని చేసే ఉద్యోగులు బీసీ విభాగాలను ఏర్పాటు చేసుకోవాలని మంత్రి పొన్నం ప్రభాకర్​ సూచించారు. బీసీ ఉద్యోగులు, విద్యార్థుల సమస్యలను ప్రభుత్వం దృష్టికి తీసుకు వెళ్లే విధంగా కమిటీలు ఏర్పాటు చేసుకోవాలన్నారు. విద్యార్థులు, ప్రభుత్వ ఉద్యోగులు ముందుండి బీసీ రిజర్వేషన్ల కోసం పోరాటం చేయాలని సూచించారు.

BC Reservations | రిజర్వేషన్లను అడ్డుకుంటున్న బీజేపీ

కేంద్రంలోని బీజేపీ (BJP) ప్రభుత్వం బీసీ రిజర్వేషన్లను అడ్డుకుంటుందని మంత్రి పొన్నం విమర్శించారు. శాసనసభలో బిల్లుకు ఆమోదం తెలిపిన బీజేపీ ఇప్పుడు మతపరమైన కారణాలు చెప్పి బిల్లును అడ్డుకోవడం సరికాదన్నారు. ముస్లింల పేరు మీద బీజేపీ ఈ చట్టాన్ని అడ్డుకోవాలని చూస్తోందని విమర్శించారు.

బీసీలకు రిజర్వేషన్ కల్పిస్తామనడంతో బీజేపీకి భయం పట్టుకుందని విమర్శించారు. అందుకే తాము రాష్ట్రపతి అపాయింట్​మెంట్​ కోరి 10 రోజులైనా కలవనివ్వడం లేదని ఆరోపించారు. రాష్ట్ర ముఖ్యమంత్రి, మంత్రులు ఢిల్లీ వెళ్లి ఎదురు చూసినా రాష్ట్రపతి ఎందుకు అపాయింట్​మెంట్​ ఇవ్వలేరన్నారు. ముస్లింల పేరుతో రిజర్వేషన్లను అడ్డుకునే ప్రయత్నాన్ని కిషన్ రెడ్డి (Kishan Reddy) మానుకోవాలన్నారు. బిల్లులో ఎక్కడా కూడా మతపరమైన ప్రస్తావన లేదన్నారు.