అక్షరటుడే, వెబ్డెస్క్ : Israel | ఇజ్రాయెల్, గాజా మధ్య యుద్ధం (Israel-Gaza War) కొనసాగుతూనే ఉంది. ఈ యుద్ధంలో ఇప్పటికే ఎంతో మంది ప్రాణాలు కోల్పోయారు. హమాస్ (Hamas) ఉగ్రవాదులు దాడి చేయడంతో ఇజ్రాయెల్ దళాలు (IDF) గాజాపై విరుచుకు పడుతున్నాయి. నెలలుగా సాగుతున్న ఈ పోరులో ఇజ్రాయెల్ ఇప్పటికే పలువురు హమాస్ కీలక నేతలను హతం చేసింది. తాజాగా మరో కీలక నేత, మిలిటరీ కంట్రోల్ విభాగాధిపతి నాసర్ మూసా (Nasser Musa)ను అంతం చేసింది. ఇటీవల ఇజ్రాయెల్ జరిపిన దాడుల్లో నాసర్ మూసా మృతి చెందినట్లు ఐడీఎఫ్ శుక్రవారం ప్రకటించింది. నాసర్ మూసా మృతితో హమాస్ కార్యకలాపాలు బలహీనపడే అవకాశం ఉందని ఇజ్రాయెల్ పేర్కొంది.
Israel | నియంత్రణ విభాగం అధిపతి
దక్షిణ గాజా (South Gaza)లో పలు స్థావరాలే లక్ష్యంగా గత వారం ఐడీఎఫ్ వైమానిక దాడులు చేపట్టింది. ఆగస్టు 9న చేపట్టిన ఈ దాడుల్లో రఫా బ్రిగేడ్‌లోని హమాస్ నియంత్రణ విభాగం అధిపతి నాసర్ ముసా ఖాన్ యూనిస్‌లో మరణించినట్లు ఇజ్రాయెల్ సైన్యం తెలిపింది. బ్రిగేడ్‌లోని యోధుల సంసిద్ధత, శిక్షణ విన్యాసాలను ముసా పర్యవేక్షించేవాడని పేర్కొంది. కాగా మూసా రఫా బ్రిగేడ్ కమాండర్ మొహమ్మద్ షబానాకు సన్నిహితుడు. అతడిని ఐడీఎప్ మేలో మట్టుబెట్టింది.
మరోవైపు గురువారం సైతం ఐడీఎఫ్ గాజాపై వైమానిక దాడులు చేపట్టింది. ఇజ్రాయెల్ ఫైటర్ జెట్‌లు హమాస్ కార్యకర్తలు రాకెట్లను నిల్వ చేయడానికి ఉపయోగించే ఖాన్ యూనిస్‌లోని భవనంపై దాడి చేశాయి. కాగా గాజా నగరాన్ని నియంత్రణలోకి తీసుకుంటామని ఇదివరకే ఇజ్రాయెల్ (Israel) ప్రకటించిన విషయం తెలిసిందే. ఈ క్రమంలో దాడులు ఉధృతం చేసింది. గాజాలోని ప్రజలకు మానవతా సాయం అందిస్తూనే నగరాన్ని ఆధీనంలోకి తీసుకోవడానికి సిద్ధం అవుతున్నట్లు ప్రధాని నెతన్యాహు కార్యాలయం ఒక ప్రకటనలో తెలిపింది.
