అక్షరటుడే, వెబ్డెస్క్ : Inflation | రాష్ట్రంలో మరోసారి ద్రవ్యోల్బణం మైనస్లోకి వెళ్లింది. సెప్టెంబర్ (September) నెలకు సంబంధించి –0.15 శాతం ద్రవ్యోల్బణం నమోదు కావడం గమనార్హం.
తెలంగాణ (Telangana) ఏర్పడినప్పటి నుంచి మూడో సారి మైనస్ ద్రవ్యోల్బణం నమోదు అయింది. 2025–26 ఆర్థిక సంవత్సరంలో జూన్, జులై, సెప్టెంబర్ నెలల్లో ద్రవ్యోల్బణం సున్న కంటే తక్కువగా ఉండటంతో ఆర్థిక నిపుణులు ఆందోళన చెందుతున్నారు. ద్రవ్యోల్బణం ధరల పెరుగుదలను సూచిస్తుంది. ఇది ఎక్కువగా ఉంటే రేట్లు పెరుగుతున్నట్లు లెక్క. ఇది మైనస్లో ఉందంటే.. గత నెలతో పోలిస్తే రేట్లు తగ్గినట్లు అర్థం. అయితే రేట్లు తగ్గితే మంచిదే కాదా అంటారా.. అక్కడే తిరకాసు ఉంది.
Inflation | డిమాండ్ లేకపోవడంతో..
ఏదైనా వస్తువుకు డిమాండ్ ఉంటే రేట్లు పెరుగుతాయి. డిమాండ్ (Demand) లేకపోతే రేట్లు తగ్గుతాయి. ప్రస్తుతం తెలంగాణలో డిమాండ్ లేకపోవడంతోనే నెగిటివ్లో ద్రవ్యోల్బణం నమోదు అవుతుంది. ఉద్యోగాలు లేకపోవడం, ప్రజల చేతిలో డబ్బులు లేకపోవడంతో ఈ పరిస్థితి వచ్చినట్లు పలువురు పేర్కొంటున్నారు. ఫలితంగా మార్కెట్లు ఖాళీగా ఉంటున్నాయి. రైతులు, వ్యాపారులు ఇబ్బందులు పడుతున్నారు. డిమాండ్ లేకపోవడంతో రాష్ట్ర ఆర్థిక వ్యవస్థ (State Economy)పై కూడా ప్రభావం చూపుతుంది. రాష్ట్రానికి పన్నుల (Tax) రూపంలో వచ్చే ఆదాయం కూడా తగ్గుతుంది.
Inflation | దేశవ్యాప్తంగా 1.54 శాతం
దేశవ్యాప్తంగా సెప్టెంబర్లో ఓవరల్ ద్రవ్యోల్బణం 1.54 శాతంగా నమోదు అయింది. గ్రామీణ ప్రాంతాల్లో 1.07శాతం, పట్టణ ప్రాంతాల్లో 2.04గా ఉంది. తెలంగాణకు వచ్చే సరికి రూరల్ ఏరియాలో –0.29శాతం, అర్బన్ ఏరియాల్లో –0.05గా ద్రవ్యోల్బనం ఉంది. మొత్తంగా –0.15శాతం ఇన్ఫ్లేషన్ రేటు ఉంది. కేరళలో అత్యధికంగా 9.05శాతం ఉంది. అస్సాంలో –0.56, బీహార్ –0.51, ఉత్తర ప్రదేశ్లో –0.61, ఆంధ్ర ప్రదేశ్లో 1.36శాతం ద్రవ్యోల్బణం ఉంది.
Inflation | గతంలో సైతం..
తెలంగాణలో గతంలో సైతం ద్రవ్యోల్బణం మైనస్లోకి వెళ్లింది. జూన్లో మైనస్ 0.93 శాతం, జులైలో –0.44గా నమోదు అయింది. రాష్ట్రం ఏర్పడినప్పటి నుంచి ఎప్పడు కూడా ద్రవ్యోల్బణం మైనస్లో నమోదు కాలేదు. తాజాగా వరుసగా మూడు సార్లు ఇన్ఫ్లేషన్ రేట్ మైనస్లో ఉండటంతో ఆర్థిక విశ్లేషకులు ఆందోళన చెందుతున్నారు. కాంగ్రెస్ ప్రభుత్వ (Congress Govt) వైఫల్యంలోనే ఇది సాధ్యమైందని బీఆర్ఎస్ నేతలు ఎద్దేవా చేస్తున్నారు.
