అక్షరటుడే, వెబ్డెస్క్: illegal sand trafficking | ఇసుక అక్రమ మైనింగ్ విషయంలో సీపీ సాయి చైతన్యపాతో పాటు పోలీసు ఉన్నతాధికారులు అత్యంత కఠినంగా వ్యవహరిస్తున్నారు.
ప్రత్యేకించి, బోధన్ నియోజకవర్గంలో అక్రమ మైనింగ్ జరగకుండా.. స్థానిక ఎమ్మెల్యే, ప్రభుత్వ ముఖ్య సలహాదారుడు సుదర్శన్రెడ్డి ఇప్పటికే అధికారులకు హెచ్చరికలు జారీ చేశారు.
అయినప్పటికీ పలువురు రెవెన్యూ, పోలీసు అధికారులు అందుకు విరుద్ధంగా వ్యవహరిస్తున్నారు. ఎవరి ఆదేశాలు కూడా లెక్కచేయకుండా అక్రమార్కులకు అండదండలు అందిస్తున్నారు.
నిజామాబాద్ జిల్లాలోని బోధన్ రూరల్ పోలీస్ స్టేషన్ పరిధిలో ఇసుక అక్రమ రవాణా మూడు పూలు ఆరు కాయలు అన్న చందంగా సాగుతోంది. ప్రత్యేకించి బోధన్ రూరల్ పోలీస్ స్టేషన్లో ఎస్హెచ్వోగా వ్యవహరిస్తున్న మచ్చేందర్పై ఆది నుంచీ తీవ్రమైన అవినీతి ఆరోపణలు ఉన్నాయి.
గతంలో జిల్లా సరిహద్దు నుంచి ఇసుక అక్రమ తవ్వకాలు జరిపించి మహారాష్ట్రకు లారీల్లో తరలించేలా అన్ని విధాలుగా సహాయ సహకారాలు అందించినట్లు ఈ అధికారిపై ఆరోపణలు వచ్చాయి.
ఆ తర్వాత బోధన్ ఎమ్మెల్యే సుదర్శన్రెడ్డి రంగంలోకి దిగి.. ఇసుక అక్రమ రవాణా కట్టడికి చర్యలు తీసుకున్నారు. అయితే, కొన్నాళ్లు స్తబ్దుగా ఉన్న పోలీసులు తిరిగి ఇసుక అక్రమ రవాణాకు అండదండలు అందిస్తున్నట్లు సమాచారం.
illegal sand trafficking | నిశీ రాతిరిలో..
బోధన్ రూరల్ పోలీస్ స్టేషన్ పరిధిలోని హంగర్గా, తగ్గెల్లి నుంచి పెద్ద ఎత్తున ఇసుక అక్రమ రవాణా జరుగుతోంది. ఈ ప్రాంతాల్లో నుంచి నిత్యం పదుల సంఖ్యల్లో బొలేరో పికప్ వాహనాల ద్వారా ఇసుకను తోడేస్తున్నారు. ప్రత్యేకించి తెల్లవారు జామున మూడు నుంచి ఐదు గంటల ప్రాంతంలో ఈ దందా కొనసాగుతోంది.
ఆ సమయంలో పోలీసు సిబ్బంది ఎవరూ సదరు వాహనాలను ఆపకుండా ఉండేలా స్థానిక ఎస్హెచ్వో పక్కా ప్రణాళికతో ఈ అక్రమ ఇసుక దందాను ప్రోత్సహిస్తున్నట్లు సమాచారం.
హంగర్గా గ్రామానికి చెందిన ఈసాఖాన్ ఈ ఇసుక అక్రమ రవాణా నడిపిస్తున్నట్లు సమాచారం. ఈ మొత్తం వ్యవహారంలో స్థానిక ఎస్సై మచ్చేందర్ అన్నీ తానై చూసుకోవడం గమనార్హం.
అయితే స్థానిక సీఐ, ఏసీపీలకు ఈ విషయాలేమీ పొక్కకుండా అత్యంత గోప్యంగా ఈ ఇసుక దందాను నడిపిస్తున్నట్లు తెలుస్తోంది.
ఒకవైపు ఇసుక అక్రమ రవాణాను ప్రోత్సహించేది లేదని స్థానిక ఎమ్మెల్యే ప్రగల్భాలు పలుకుతుంటే.. మరోవైపు ఆయన ఇలాఖాలోనే ఎస్సైలు ఇందుకు విరుద్ధంగా వ్యవహరిస్తుండడం కొసమెరుపు.
సొంత సామాజిక వర్గానికి చెందిన అధికారి కావడంతో సుదర్శన్రెడ్డి ఎలాంటి చర్యలు తీసుకోవడం లేదనే ప్రచారం జరుగుతోంది. నీతి నిజాయితీ అని హడావుడి చేసే.. సుదర్శన్ రెడ్డి, ఈ అక్రమాలకు పాల్పడుతున్న ‘రెడ్డి’ అధికారి విషయంలో ఎలా స్పందిస్తారనేది వేచి చూడాలి.
