అక్షరటుడే, సిరికొండ : Sirikonda | ఇంట్లో భార్య అన్నం పెట్టలేదని అలిగి కరెంట్ స్తంభం ఎక్కాడు ఓ భర్త. ఈ ఘటన సిరికొండ (Sirikonda) మండలంలో మంగళవారం చోటు చేసుకుంది.
పోలీసులు తెలిపిన వివరాల ప్రకారం.. సిరికొండ మండలం చీమన్పల్లి గ్రామానికి (Cheemanpally Village) చెందిన అలకుంట సుమన్ వడ్డెర వృత్తి చేస్తూ జీవిస్తున్నాడు. అయితే మంగళవారం ఇంట్లో భార్యతో జరిగిన గొడవ కారణంగా ఆమె అతడికి భోజనం పెట్టలేదు. దీంతో అలిగిన భర్త సుమన్ తాగిన మైకంలో గ్రామంలో ఉన్న విద్యుత్ స్తంభం (Electricity Pole) ఎక్కాడు. స్థానికులు ఎంత నచ్చజెప్పినా వినలేదు. దీంతో వారు వెంటనే పోలీసులకు సమాచారం అందించారు. సంఘటనా స్థలానికి హుటాహుటిన చేరుకున్న పోలీసులు అతడికి నచ్చజెప్పి కిందికి దించారు. దీంతో పోలీసులు, గ్రామస్థులు ఊపిరి పీల్చుకున్నారు.
