అక్షరటుడే, వెబ్డెస్క్ : Weather Updates | రాష్ట్రాన్ని వానలు వీడటం లేదు. నిత్యం వర్షాలు పడుతుండటంతో ప్రజలు తీవ్ర ఇబ్బందులు పడుతున్నారు.
తెలంగాణలోని పలు జిల్లాల్లో మంగళవారం సైతం భారీ వర్షం (Heavy Rain) కురుస్తుందని వాతావరణ శాఖ (IMD) అధికారులు తెలిపారు. వికారాబాద్, మెదక్, సంగారెడ్డి, సిద్దిపేట, కామారెడ్డి, సిరిసిల్ల, రంగారెడ్డి, మహబూబ్నగర్, నారాయణపేట జిల్లాల్లో భారీ వర్షాలు కురుస్తాయన్నారు. మిగతా జిల్లాల్లో అక్కడక్కడ మోస్తరు వాన పడుతుంది.
Weather Updates | హైదరాబాద్ నగరంలో..
నగరంలో ఉదయం నుంచి చిరు జల్లులు కురుస్తాయి. సాయంత్రం, రాత్రి పూట మోస్తరు నుంచి భారీ వర్షాలు పడుతాయి. సోమవారం సైతం నగరాన్ని వర్షం అతలాకుతలం చేసింది. దీంతో ప్రజలు అప్రమత్తంగా ఉండాలని అధికారులు సూచించారు. సాయంత్రం పూట అత్యవసరం అయితేనే బయటకు రావాలన్నారు.
Weather Updates | వర్ష బీభత్సం
రాష్ట్రంలోని పలు జిల్లాల్లో సోమవారం వర్షం బీభత్సం సృష్టించింది. హైదరాబాద్ (Hyderabad) నగరంతో పాటు, భువనగిరి, ములుగు, హన్మకొండ, జనగామ, కొత్తగూడెం, సిద్దిపేట, మెదక్, కామారెడ్డి జిల్లాల్లో భారీ వర్షం కురిసింది. ముఖ్యంగా హైదరాబాద్లో ఒక్కసారిగా కుండపోత వాన పడటంతో నగరవాసులు అనేక ఇబ్బందులు పడ్డారు. లోతట్టు ప్రాంతాలు జలమయం అయ్యాయి.
వరద ఉధృతికి పలుచోట్ల వాహనాలు కొట్టుకుపోయాయి. రోడ్లపై నీరు నిలవడంతో ట్రాఫిక్ జామ్ అయింది. సోమవారం ఉదయం 8:30 గంటల నుంచి మంగళవారం ఉదయం 7 గంటల వరకు అత్యధికంగా భువనగిరి జిల్లా పాముకుంటలో 127.8 మి.మీ. వర్షం కురిసింది. ములుగు జిల్లా మల్లంపల్లిలో 107, హైదరాబాద్లోని బంజరాహిల్స్లో 106.5, హన్మకొండ జిల్లా ఆత్మకూర్లో 103, జనగామ జిల్లా నర్మెట్టలో 101.8, భువనగిరి జిల్లా రాజ్పేట్లో 101.5, హైదరాబాద్లోని శ్రీనగర్ కాలనీలో 100.5 మి. మీ. వర్షపాతం నమోదు అయింది.
