అక్షరటుడే, ఎల్లారెడ్డి : Nizam Sagar | నిజాంసాగర్ ప్రాజెక్ట్ (Nizam Sagar)కు ఎగువ నుంచి భారీగా వరద వస్తోంది. దీంతో అధికారులు నాలుగు గేట్లు ఎత్తి దిగువకు నీటిని విడుదల చేస్తున్నారు.
ఉమ్మడి మెదక్, కామారెడ్డి జిల్లాల్లో మూడు రోజులుగా కురుస్తున్న వర్షాలతో మంజీర (Manjeera) నదికి వరద పెరిగింది. ప్రస్తుతం నిజాంసాగర్లోకి 22 వేల క్యూసెక్కుల ఇన్ఫ్లో వస్తోంది. దీంతో అధికారులు నాలుగు వరద గేట్లను ఎత్తి అంతే మొత్తంలో దిగువకు విడుదల చేస్తున్నారు. ప్రాజెక్ట్ పూర్తిస్థాయి నీటిమట్టం 1405 (17.80 టీఎంసీలు) అడుగులు కాగా.. ప్రస్తుతం 1404 (17. 78 టీఎంసీలు) అడుగుల నీరు నిల్వ ఉందని ప్రాజెక్ట్ అధికారులు తెలిపారు. ఎగువ నుంచి వస్తున్న వరద ఉధృతిని పరిశీలిస్తూ దిగువ ప్రాంతానికి నీటిని విడుదల చేస్తున్నట్లు అధికారులు పేర్కొంటున్నారు.
Nizam Sagar | పొంగిపొర్లుతున్న పోచారం
నాగిరెడ్డిపేట మండలంలోని పోచారం ప్రాజెక్టు (Pocharam Project)లోకి ఇన్ఫ్లో కొనసాగుతోంది. మెదక్, కామారెడ్డి జిల్లాల్లో కురిసిన వర్షాలతో పెద్దవాగు, గుండారం వాగు, పాముల వాగు ద్వారా డ్యామ్లోకి భారీగా వరద వస్తోంది. జలాశయంలోకి 6 వేల క్యూసెక్కుల ఇన్ఫ్లో వస్తున్నట్లు అధికారులు తెలిపారు. ప్రధాన కాలువకు 50 క్యూసెక్కుల వదులుతున్నారు. మిగతా నీరు అలుగుపై నుంచి పారుతోంది.
Nizam Sagar | పర్యాటకులకు నో ఎంట్రీ..
పోచారం జలాశయం పొంగి పొర్లుతుండటంతో అందాలను తిలకించేందుకు పర్యాటకులు తరలి వస్తున్నారు. అయితే ఎగువ నుంచి వరద కొనసాగుతుండటం, వర్షాలు పడుతుండటంతో అధికారులు డ్యామ్ వద్దకు ఎవరిని అనుమతించడం లేదు.
Nizam Sagar | ప్రజలు అప్రమత్తంగా ఉండాలి
ప్రాజెక్టును డీఈ వెంకటేశ్వర్లు పర్యవేక్షించారు. ఆ ప్రాంతంలో తీసుకోవాల్సిన జాగ్రత్తలపై సిబ్బందికి ఆదేశాలిచ్చారు. వర్షాలు, వరదలతో ప్రజలు అప్రమత్తంగా ఉండాలని సూచించారు. లోలెవెల్ వంతెనల వద్ద ప్రమాదకర ప్రయాణాలు చేయవద్దని పోలీసులు పేర్కొన్నారు. శిథిలావస్థలో ఉన్న ఇళ్లలో ఎవరూ ఉండొద్దని అధికారులు సూచించారు.
