అక్షరటుడే, వెబ్డెస్క్: CI Shivakumar | సంగారెడ్డిలో మున్సిపల్ పోలింగ్ సమయంలో కాంగ్రెస్ సీనియర్ నేత జగ్గారెడ్డి వ్యవహరించిన తీరుపై తీవ్ర విమర్శలు వెలువడుతున్నాయి. విధుల్లో ఉన్న సీఐ శివకుమార్ యాదవ్ పనితీరును తప్పుపట్టడాన్ని.. ఆయనపై బూతు పురాణం వల్లించడాన్ని పోలీసులు, ప్రజలు, నెటిజన్లు ఖండిస్తున్నారు. ఈ క్రమంలో సీఐ వ్యవహరించిన తీరును మెచ్చుకుంటూనే.. ఆయనకు మద్దతుగా నిలబడుతున్నారు. పలువురు పోలీసులు తమ వాట్సప్ స్టేటస్లో సీఐ శివకుమార్ యాదవ్ ఫొటో పెట్టుకుంటున్నారు. రిటైర్డ్ ఐపీఎస్ ఆర్ఎస్ ప్రవీణ్ కూడా సీఐకి మద్దతుగా నిలబడ్డారు.
ఇక నెటిజన్లు శివకుమార్ను మోసేస్తున్నారు. ఆయన గతంలో చేసిన సేవలను గుర్తుచేస్తూ.. ప్రశంసలు కురిపిస్తున్నారు. సీఐ శివకుమార్ యాదవ్ విషయంలో జగ్గారెడ్డి ప్రవర్తించిన తీరును తప్పు పడుతున్నారు. జగ్గారెడ్డి భేషరతుగా సీఐకి క్షమాపణ చెప్పాలని డిమాండ్ చేస్తున్నారు.
CI Shivakumar | అసలేం జరిగిందంటే..
పుర ఎన్నికల పోలింగ్ సందర్భంగా సంగారెడ్డిలో పలుచోట్ల స్వల్ప ఘర్షణలు చోటుచేసుకున్నాయి. సంగారెడ్డిలో పోలీసుల తీరు సరికాదంటూ, పోలింగ్ ఆపేస్తామని కాంగ్రెస్ సీనియర్ నాయకుడు జగ్గారెడ్డి స్థానిక 34 వార్డు పోలింగ్ బూత్లోకి చొచ్చుకెళ్లారు. కాంగ్రెస్ అభ్యర్థి చొక్కాను సీఐ శివకుమార్ యాదవ్ పట్టుకుని లాగారంటూ ఆ పార్టీ నేతలు ఆరోపించారు. సమాచారం అందుకున్న జగ్గారెడ్డి తన అనుచరులతో పోలింగ్ కేంద్రం వద్దకు చేరుకున్నారు.
తమ పార్టీ అభ్యర్థిపై సీఐ ఎలా దాడి చేస్తారని పోలీస్ అధికారులను జగ్గారెడ్డి నిలదీశారు. ఈ క్రమంలోనే పోలింగ్ ఆపేస్తామంటూ పోలింగ్ కేంద్రంలోకి దూసుకెళ్లే ప్రయత్నం చేశారు. దీంతో కాంగ్రెస్ పార్టీ కార్యకర్తలతోపాటు జగ్గారెడ్డిని పోలీసులు అడ్డుకున్నారు. ఈ క్రమంలోనే భారాస అభ్యర్థి చేసే రిగ్గింగ్కు సీఐ సహకారం అందిస్తున్నారని జగ్గారెడ్డి ఆరోపిస్తూ నిరసనకు దిగారు. సదరు సీఐని సస్పెండ్ చేయకపోతే పోలింగ్ను బహిష్కరిస్తానని హెచ్చరించారు. దీంతో పోలింగ్ బూత్ వద్ద ఉద్రిక్త పరిస్థితి నెలకొంది.
CI Shivakumar | సీఐ ఇందూరు వాసే..
జగ్గారెడ్డి విషయంలో వివాదాలు ఎదుర్కొంటున్న సీఐ శివకుమార్ యాదవ్ నిజామాబాద్ జిల్లాకు చెందిన వారు. నగరంలోని గౌతంనగర్లో ఉండేవారు. శివకుమార్ సాధారణ వ్యవసాయ కుటుంబంలో జన్మించారు. తండ్రి గంగయ్య కానిస్టేబుల్గా పనిచేసి రిటైర్ అయ్యారు. ఇక 2007లో శివకుమార్ ఎస్సై శిక్షణకు అర్హత పొందారు. తదుపరి మాదాపూర్ ఠాణాలో నేర పరిశోధన (డిటెక్టివ్) ఎస్సైగా బాధ్యతలు స్వీకరించారు.
CI Shivakumar | అత్యున్నత శౌర్య పతకం సొంతం..
దొంగతనాల నివారణపై దృష్టి సారించారు. పలువురు నిందితులను అదుపులోకి తీసుకుని రూ.70 లక్షల వరకు రికవరీ చేయించారు. దొంగల ముఠా హమీద్ ఖురేషీ గ్యాంగ్ను పట్టుకుని రూ. 40 లక్షలు రికవరీ చేయించారు. 110 చైన్ స్నాచింగ్ కేసులను, ఎనిమిది హత్య కేసులను ఛేదించారు. జంట నగరాల్లో కరుడు గట్టిన నేరగాళ్లు జమీర్ ఫారూఖ్, సకి సలాఉద్దీన్ను అదుపులోకి తీసుకున్నారు. శివ కుమార్ సేవలను గుర్తించిన రాష్ట్ర ప్రభుత్వం సిఫారసుతో.. రాష్ట్రపతి చేతుల మీదుగా అత్యున్నత శౌర్య పతకం అందుకున్నారు.
