Kavitha | నిరుద్యోగుల గోస పట్టని ప్రభుత్వం.. కవిత విమర్శలు

3

అక్షరటుడే, వెబ్​డెస్క్ : Kavitha | గ్రూప్​–1 అభ్యర్థులకు మద్దతుగా తెలంగాణ జాగృతి అధ్యక్షురాలు కల్వకుంట్ల కవిత బుధవారం గన్​పార్క్​ వద్ద నిరసనలో పాల్గొన్నారు. ఈ సందర్భంగా ఆమె ప్రభుత్వంపై మండిపడ్డారు.గ్రూప్​–1 అభ్యర్థులకు మద్దతుగా చేపట్టిన ధర్నాలో కవిత(Kavitha) మాట్లాడారు.

నిరుద్యోగుల గోస కాంగ్రెస్ ప్రభుత్వానికి పట్టడం లేదని విమర్శించారు. కాంగ్రెస్​లో కొందరికి ఉద్యోగాలు ఇవ్వడానికి గ్రూప్​–1 పరీక్ష(Group 1 Exam) పెట్టారా అని ప్రశ్నించారు. నిరుద్యోగులకు హామీలు ఇచ్చి అధికారంలోకి వచ్చిన సీఎం రేవంత్​రెడ్డి ఇప్పుడు వాళ్లనే మోసం చేస్తున్నారని ఆగ్రహం వ్యక్తం చేశారు.

Kavitha | పేపర్లు బయట పెట్టాలి

గ్రూప్​–1 పరీక్ష రాసిన అభ్యర్థులు.. ఉద్యోగాలు వచ్చిన వారి పేపర్లు బయట పెట్టాలని కోరుతున్నారని కవిత అన్నారు. ఆ మేరకు వారి పేపర్లు బయట పెట్టాలని ఆమె డిమాండ్​ చేశారు. గత ప్రభుత్వం హయాంలో వెలువడిన నోటిఫికేషన్లకు సంబంధించి 50 వేల ఉద్యోగాలు ఇచ్చి రేవంత్​రెడ్డి(CM Revanth Reddy) తామే ఇచ్చినట్లు గొప్పలు చెప్పుకుంటున్నారని విమర్శించారు. గ్రూప్​–1 పరీక్ష మళ్లీ నిర్వహించాలని గురువారం రేపు ప్రెస్‌క్లబ్‌లో రౌండ్ టేబుల్ సమావేశం నిర్వహిస్తున్నట్లు ఆమె తెలిపారు. ఉద్యోగాలు వచ్చిన అభ్యర్థులపై తమకు కోపం లేదని ఆమె పేర్కొన్నారు. అయితే అక్రమంగా తెచ్చుకున్న వారిపైనే కోపమని స్పష్టం చేశారు.

Kavitha | అనేక అక్రమాలు జరిగాయి

పలువురు నిరుద్యోగులు మాట్లాడుతూ.. గ్రూప్​–1 పరీక్షల్లో అనేక అక్రమాలు జరిగాయని ఆరోపించారు. ధనవంతుల పిల్లలకే ఉద్యోగాలు వచ్చాయన్నారు. ప్రైవేట్​ అధ్యాపకులతో పేపర్లను దిద్దించారన్నారు. సీఎంకు వ్యతిరేకంగా నినాదాలు చేశారు. గ్రూప్​–1 పరీక్షలు మళ్లీ నిర్వహించాలని డిమాండ్ చేశారు. లేదంటే ఆందోళనలు మరింత ఉధృతం చేస్తామన్నారు. కోర్టులో కేసు విచారణ ఉండగా నియామక పత్రాలు అంత హడావుడిగా ఎందుకు ఇచ్చారని ప్రశ్నించారు.