అక్షరటుడే, వెబ్డెస్క్ : Child Care Centre | ఉద్యోగాలు చేసే మహిళలు పిల్లలను చూసుకోవడానికి అనేక ఇబ్బందులు పడుతుంటారు. ముఖ్యంగా బడీడుకు రాని పిల్లలను తమతో తీసుకు వెళ్లాలేక బేబీకేర్ సెంటర్ల (Baby Care Centers)లో వదులుతుంటారు.
ఇంట్లో పెద్దలు ఉన్న వారు వారి దగ్గర పిల్లలను వదిలి కొలువులకు వెళ్తారు. అయితే ప్రస్తుతం చాలా మంది కొలువుల కోసం వివిధ ప్రాంతాల్లో స్థిర పడుతుండటంతో పెద్దలు ఉండటం లేదు. దీంతో ఉద్యోగిణులు తమ పిల్లల విషయంలో ఆందోళన చెందుతుంటారు. బయట బేబీ కేర్ సెంటర్లో వదిలినా జాగ్రత్తగా చూసుకుంటారా లేదా అని భయపడుతారు. అలాంటి ఉద్యోగుల కోసం జనగాం (Jangaon) కలెక్టర్ ప్రత్యేక చొరవ తీసుకున్నారు. కలెక్టరేట్లో పని చేసే మహిళ సిబ్బంది కోసం శిశు సంరక్షణ కేంద్రం ప్రారంభించారు.
Child Care Centre | ఉద్యోగిణుల హర్షం
కలెక్టరేట్ ప్రాంగణంలో కలెక్టర్ రిజ్వాన్ బాషా షేక్ (Collector Rizwan Basha Sheikh) శిశు సంరక్షణ కేంద్రాన్ని ప్రారంభించారు. చిన్న పిల్లలు ఉన్న మహిళా ఉద్యోగులు ప్రతి నెలా ప్రైవేట్ డే కేర్ కేంద్రాలలో వేల రూపాయలు ఖర్చు చేయవలసి వస్తుంది. ఖర్చు ఉన్నప్పటికీ, తల్లులు తమ పిల్లల శ్రేయస్సు గురించి ఆందోళన చెందుతారు. అధికారిక విధులను నిర్వర్తిస్తున్నప్పటికీ, తల్లి మనస్సు తన బిడ్డ గురించి ఆందోళన చెందుతుంది. దీంతో కలెక్టర్ కార్యాలయ ప్రాంగణంలో ఇన్-హౌస్ చైల్డ్ కేర్ సెంటర్ ఏర్పాటు చేశారు. కలెక్టరేట్లోని వివిధ విభాగాలలో పనిచేసే మహిళా ఉద్యోగులు తమ పిల్లలను తీసుకొచ్చి అందులో వదిలేయొచ్చు. విధులు ముగించుకొని వెళ్లే సమయంలో వెంట తీసుకు వెళ్లొచ్చు. దీంతో పిల్లల భద్రత విషయంలో ఆందోళన చెందాల్సిన అవసరం లేకుండా పోయిందని ఉద్యోగిణులు హర్షం వ్యక్తం చేస్తున్నారు.
ఈ కేంద్రంలో పిల్లల కోసం బొమ్మలు, ఇతర సౌకర్యాలు ఏర్పాటు చేశారు. కలెక్టర్ మాట్లాడుతూ, చిన్న పిల్లలు ఉన్న మహిళా ఉద్యోగులు ఈ సౌకర్యాన్ని ఉపయోగించుకోవాలని సూచించారు. బొమ్మలతో పాటు, పిల్లలలో ప్రారంభ అభ్యాసాన్ని ప్రోత్సహించడానికి కేంద్రంలో చిత్ర పుస్తకాలు, స్లేట్లు, పెన్సిళ్లు, డ్రాయింగ్ మెటీరియల్స్ మరియు ఇతర అభ్యాస వనరులను కూడా ఏర్పాటు చేశారు. మిగతా ప్రభుత్వ కార్యాలయాల్లో సైతం ఇలాంటి ఏర్పాట్లు చేయాలని మహిళా ఉద్యోగులు కోరుతున్నారు.
