అక్షరటుడే, వెబ్డెస్క్: EPFO | ఈపీఎఫ్వో సంస్థ తన చందాదారులకు గుడ్ న్యూస్ చెప్పింది. దేశవ్యాప్తంగా ప్రైవేట్ కంపెనీల్లో (private companies) ఉద్యోగాలు చేసే వారి జీతాల్లో నుంచి ప్రతినెలా కొంత మొత్తం పీఎఫ్ కట్ అవుతున్న విషయం తెలిసిందే.
ప్రతి ఉద్యోగి బేసిక్ వేతనంలో 12 శాతం పీఎఫ్ కట్ అవుతుంది. అంతే మొత్తంలో ఉద్యోగి పని చేసే సంస్థ కూడా ఆయన ఖాతాలో జమ చేస్తుంది. ఇందులో 8.33 శాతం పెన్షన్ ఖాతాలో జమ అవుతుండగా.. 3.67శాతం పీఎఫ్ ఖాతాలో (PF account) జమ అవుతుంది. ఎప్పుడైనా అత్యవసర పరిస్థితుల్లో డబ్బులు డ్రా చేసుకోవాలంటే పెన్షన్ ఖాతాలో నుంచి తీసుకునే వీలుండదు. ఉద్యోగి+కంపెనీ జమ చేసిన 3.67శాతం డబ్బుల నుంచే డ్రా చేసుకోవాలి.
EPFO | సేవలు సులభతరం
ఈపీఎఫ్వో సేవల కోసం గతంలో ఖాతాదారులు చాలా ఇబ్బందులు పడేవారు. అయితే ప్రస్తుతం ఆధునిక సాంకేతికత అందుబాటులోకి రావడంతో ఈ సంస్థ కూడా సేవలను సులభతరం చేసింది. అన్ని లావాదేవీలను ఆన్లైన్లో చేసే అవకాశం కల్పించింది. ఆన్లైన్లోనే డబ్బులు విత్డ్రా చేసుకోవచ్చు. అయితే వివిధ కారణాలతో డబ్బులు తీసుకోవడానికి సంస్థ అవకాశం కల్పిస్తోంది. అయితే ఇంటి నిర్మాణం, కొనుగోలు కోసం డబ్బులు డ్రా చేసుకోవాలంటే గతంలో ఐదేళ్లు సభ్యులుగా ఉన్న వారికే అవకాశం ఉండేది. తాజాగా ఆ వ్యవధిని సంస్థ మూడేళ్లకు తగ్గించింది.
EPFO | ఒక్కసారి మాత్రమే..
ఈపీఎఫ్వో తాజా నిర్ణయంతో ఎంతోమందికి మేలు జరగనుంది. చాలా మంది ఉద్యోగంలో చేరిన కొత్తలో ఇల్లు నిర్మించుకోవడమో, కొనుగోలు చేయడమో చేస్తారు. అలాంటి సమయంలో డౌన్ పేమెంట్ (down payment) కోసం డబ్బులు కావాల్సి ఉంటుంది. అయితే ఈపీఎఫ్వోలో ఐదేళ్ల వరకు గతంలో డబ్బులు తీసుకోవడానికి అవకాశం లేక చాలా మంది ఇబ్బంది పడేవారు. తాజాగా ఆ వ్యవధిని మూడేళ్లకు తగ్గించడంతో ఎంతో మంది దీనిని వినియోగించుకునే అవకాశం ఉంది. ప్రస్తుతం 68-BD కింద పీఎఫ్ ఖాతాదారులు ఆస్తి కొనుగోలు, నిర్మాణం లేదా EMI చెల్లింపు కోసం వారి PF మొత్తంలో 90 శాతం వరకు ఉపసంహరించుకోవచ్చు. అయితే దీనికింద జీవితంలో ఒక్కసారి మాత్రమే విత్ డ్రా చేసుకునే అవకాశం ఉంటుంది.
EPFO | పలు కీలక మార్పులు
ఈపీఎఫ్వో ఖాతాదారుల కోసం ఇటీవల పలు కీలక మార్పులు తీసుకు వచ్చింది. అత్యవసర ఖర్చుల కోసం యూపీఐ, ఏటీఎం ద్వారా రూ.లక్ష వరకు విత్ డ్రా చేసుకునే అవకాశాన్ని సంస్థ జూన్ నుంచి అందుబాటులోకి తెచ్చింది. అలాగే ఆటోమెటిక్ క్లెయిమ్ సెటిల్మెంట్ పరిమితిని రూ.లక్ష నుంచి రూ.ఐదు లక్షలకు పెంచింది. వివిధ క్లెయిమ్ల కోసం చేసుకున్న దరఖాస్తులను వేగంగా పరిష్కరిస్తోంది. చాలా క్లెయిమ్‌లు 3-4 రోజుల్లోపు ప్రాసెస్ అవుతున్నాయి.
