అక్షరటుడే, వెబ్డెస్క్ : Feb 01 Gold Prices | అంతర్జాతీయ స్థాయిలో బంగారం రేట్లు క్రమంగా తగ్గుతున్నాయి. గత కొద్ది రోజులుగా వచ్చిన గోల్డ్ రేట్ల పెరుగుదలకు ఒక్కసారిగా బ్రేక్ పడింది. మొన్నటివరకు ధరలు పెరగ్గా.. ఇప్పుడు ఒక్కసారిగా తగ్గుముఖం పడుతున్నాయి.
గత నాలుగు, ఐదు రోజులుగా బంగారం, వెండి ధరలు (Silver Prices) తీవ్ర ఒడిదుడుకులను ఎదుర్కొంటున్నాయి. ఇటీవల వరుసగా పెరుగుతూ ఆల్టైమ్ గరిష్టాలకు చేరుకున్న పసిడి, వెండి ధరల్లో భారీ లాభాల స్వీకరణ జరగడంతో ఒక్కసారిగా కిందకు జారాయి. అయినప్పటికీ అంతర్జాతీయ స్థాయిలో భౌగోళిక రాజకీయ అనిశ్చితులు, ఆర్థిక అస్థిరతల నేపథ్యంలో పెట్టుబడిదారులు సురక్షిత ఆస్తులైన బంగారం, వెండి వైపు మొగ్గు చూపుతుండటంతో డిమాండ్ మాత్రం కొనసాగుతూనే ఉంది. ఈ పరిస్థితుల్లో ఫిబ్రవరి 1 ఉదయం దేశీయ మార్కెట్లో బంగారం ధరలు మళ్లీ కొంత స్థిరపడినట్లు కనిపిస్తున్నాయి. 24 క్యారెట్ల 10 గ్రాముల బంగారం ధర రూ.1,60,580కు చేరుకోగా, 22 క్యారెట్ల 10 గ్రాముల బంగారం ధర రూ.1,47,200గా నమోదైంది.
Feb 01 Gold Prices | తగ్గుతున్న ధరలు
దేశ రాజధాని ఢిల్లీలో (Delhi) 24 క్యారెట్ల 10 గ్రాముల పసిడి రూ.1,60,730 వద్ద ఉండగా, 22 క్యారెట్ల బంగారం రూ.1,47,350కు చేరింది. మరోవైపు ఇటీవల భారీగా పెరిగిన వెండి ధరలు కూడా గత రెండు రోజులుగా కాస్త శాంతించాయి. ఒక దశలో కిలోకు రూ.4.25 లక్షల గరిష్టాన్ని తాకిన వెండి ధర రెండ్రోజుల్లో దాదాపు రూ.75 వేల వరకు పడిపోవడం మార్కెట్లో చర్చనీయాంశమైంది. ప్రస్తుతం దేశంలోని ప్రధాన నగరాల్లో వెండి ధరలు కూడా స్థిరంగా కదులుతున్నాయి. నేడు హైదరాబాద్, విజయవాడ, కేరళ ప్రాంతాల్లో కిలో వెండి ధర రూ.3,20,000గా ఉండగా, ఢిల్లీ, ముంబై, బెంగళూరు, కోల్కతా, వడోదర, అహ్మదాబాద్ నగరాల్లో రూ.3,50,000గా నమోదైంది. చెన్నైలో మాత్రం కిలో వెండి ధర రూ.2,56,900 వద్ద కొనసాగుతోంది.
ఇక బంగారం (Gold) విషయానికి వస్తే హైదరాబాద్, విజయవాడ, ముంబై, కోల్కతా, చెన్నై, బెంగళూరు, కేరళ, పుణే నగరాల్లో 24 క్యారెట్ల 10 గ్రాముల బంగారం రూ.1,60,580గా ఉండగా, 22 క్యారెట్ల బంగారం రూ.1,47,200గా ఉంది. ఢిల్లీలో 24 క్యారెట్ల బంగారం రూ.1,60,730, 22 క్యారెట్ల బంగారం రూ.1,47,350గా నమోదైంది. వడోదరలో 24 క్యారెట్ల పసిడి రూ.1,60,630, 22 క్యారెట్ల బంగారం రూ.1,47,250గా ఉంది. అంతర్జాతీయ మార్కెట్లో డాలర్ మార్పులు, కేంద్ర బ్యాంకుల విధానాలు, యుద్ధ భయాలు వంటి అంశాలు బంగారం, వెండి ధరలపై ప్రభావం చూపుతున్నాయని మార్కెట్ నిపుణులు చెబుతున్నారు. రాబోయే రోజుల్లో కూడా ఇదే తరహా ఒడిదుడుకులు కొనసాగే అవకాశముందని, పెట్టుబడిదారులు జాగ్రత్తగా వ్యవహరించాలని సూచిస్తున్నారు.
