అక్షరటుడే, వెబ్డెస్క్: G7 Summit | ఇరాన్–ఇజ్రాయెల్(Iran–Israel) మధ్య ఉద్రిక్తతలతో పశ్చిమాసియలో యుద్ధమేఘాలు అలుముకున్న విషయం తెలిసిందే. ఇరాన్లోని అణుస్థావరాలే లక్ష్యంగా ఆపరేషన్ రైజింగ్ లయన్(Operation Rising Lion) పేరిట మొదట ఇజ్రాయెల్ దాడులకు పాల్పడింది. దీనికి ప్రతీకారంగా ఇరాన్ ట్రూ ప్రామిస్–3 పేరిట టెల్అవీవ్పై విరుచుకుపడింది. దీంతో రెండు దేశాల మధ్య దాడులు ఇంకా కొనసాగుతున్నాయి. ఈ క్రమంలో జీ7 దేశాలు ఇజ్రాయెల్కు మద్దతు తెలిపాయి.
ప్రపంచంలో ఆర్థికంగా బలంగా ఉండి.. ఆర్థిక వ్యవస్థను శాసించే స్థితిలో ఉన్న ఏడు దేశాలు కూటమిగా ఏర్పడ్డాయి. దీనిని జీ–7 కూటమి అంటారు. ఇందులో అమెరికా, యూకే, కెనడా, ఫ్రాన్స్, జర్మనీ, ఇటలీ, జపాన్ దేశాలు ఉన్నాయి. 1975లో ఈ కూటమి ఏర్పడింది. ప్రస్తుతం కెనడాలో జీ7 సదస్సు జరుగుతున్న విషయం తెలిసిందే. ఈ సదస్సుకు కెనడా ప్రధాని మార్క్ కార్నే(Canadian PM Mark Carney) భారత ప్రధాని మోదీని(PM Modi) ఆహ్వానించారు. దీంతో మోదీ ఈ సమావేశానికి హాజరయ్యారు. అయితే సమావేశంలో భాగంగా ఇరాన్– ఇజ్రాయెల్ ఉద్రిక్తతలపై ప్రతినిధులు చర్చించారు.
G7 Summit | ఇజ్రాయెల్కు ఆత్మరక్షణ హక్కు ఉంది
ఇరాన్ అణుశక్తి దేశంగా మారితే తమకు ముప్పు పొంచి ఉందని టెల్అవీవ్(Tel Aviv) ఆపరేషన్ రైజింగ్ లయన్ చేపట్టిన విషయం తెలిసిందే. దీనిపై జీ 7 దేశాలు స్పందిస్తూ ఇజ్రాయెల్కు ఆత్మరక్షణ హక్కు ఉందని ప్రకటించారు.
ఇజ్రాయెల్కు కూటమి దేశాలు మద్దతు ప్రకటించాయి. అంతేగాకుండా దాడులను విరమించుకోవాలని ఇరాన్కు సూచించాయి. ఇరాన్ అణ్వాయుధాన్ని కలిగి ఉండకూడదని స్పష్టం చేశారు. ప్రాంతీయ అస్థిరత, ఉగ్రవాదానికి ఇరాన్ కారణమని ఆయా దేశాలు అభిప్రాయపడ్డాయి. యుద్ధ ప్రభావం అంతర్జాతీయ ఇంధన మార్కెట్లపై పడుతుందని, అప్రమత్తంగా ఉండాలని జీ7 దేశాలు సూచించాయి.
G7 Summit | ఇరాన్ గెలవదు
ప్రాంతీయ సుస్థిరత కోసం రెండు దేశాలు ఉద్రిక్తతలు తగ్గించుకోవాలని జీ7 దేశాలు సూచించాయి. సదస్సులో అమెరికా అధ్యక్షుడు డోనాల్డ్ ట్రంప్(US President Donald Trump) మాట్లాడుతూ.. ఈ యుద్ధంలో ఇరాన్ గెలవదని చెప్పారు. ఆలస్యం కాకముందే ఇరాన్ సంప్రదింపుల ప్రక్రియ ప్రారంభిస్తే మేలని సూచించారు. అమెరికా సంస్థలపై దాడిచేస్తే కనీవినీ ఎరుగని రీతిలో ప్రతిదాడులు చేస్తామని ఇరాన్‌ను హెచ్చరించారు. కాగా.. ఇజ్రాయెల్లోని అమెరికా రాయబార కార్యాలయంపై ఇరాన్ దాడి చేసిన విషయం తెలిసిందే. ఇజ్రాయెల్–ఇరాన్ ఉద్రిక్తతల నేపథ్యంలో అమెరికా అధ్యక్షుడు తన కెనడా(Canada) పర్యటనను మధ్యలోనే ముగించుకొని తిరుగు పయనం అయ్యారు. జీ7 సదస్సు నుంచి ఆయన అమెరికా బయలుదేరారు.
