అక్షరటుడే, మెండోరా : Sriram Sagar | ఉత్తర తెలంగాణ జిల్లాల వరప్రదాయని శ్రీరామ్ సాగర్ ప్రాజెక్ట్ (SRSP)కు ఎగువ నుంచి ఇన్ఫ్లో తగ్గుముఖం పట్టింది. జలాశయంలోకి వరద తగ్గడంతో అధికారులు గేట్ల ద్వారా నీటి విడుదలను నిలిపివేశారు.
ప్రాజెక్ట్లోకి ప్రస్తుతం 10 వేల క్యూసెక్కుల ఇన్ఫ్లో వస్తోంది. దీంతో అధికారులు వరద గేట్లను మూసి వేశారు. ఎస్కేప్ గేట్ల ద్వారా 4 వేల క్యూసెక్కులు, కాకతీయ కాలువ (Kakatiya Canal)కు 4 వేలు, లక్ష్మి కాలువకు 200, సరస్వతి కాలువకు 650, మిషన్ భగీరథకు 231 క్యూసెక్కులు విడుదల చేస్తున్నారు. ఆవిరి రూపంలో 709 క్యూసెక్కులు పోతుంది. మొత్తం ఔట్ ఫ్లో 9,790 క్యూసెక్కులుగా ఉంది. ఇన్ఫ్లో, ఔట్ ఫ్లో దాదాపుగా సమానంగా ఉండటంతో ప్రాజెక్ట్ నీటిమట్టం నిలకడగా ఉంది. ప్రాజెక్ట్ పూర్తిస్థాయి నీటిమట్టం 1091 అడుగులు (80.5 టీఎంసీలు) కాగా.. ప్రస్తుతం 1090.90 (80.05 టీఎంసీలు) అడుగుల నీరు నిల్వ ఉంది.
Sriram Sagar | కొనసాగుతున్న విద్యుత్ ఉత్పత్తి
ఎస్సారెస్పీ దిగువన గల జల విద్యుత్ కేంద్రంలో ఉత్పత్తి కొనసాగుతోంది. ప్రాజెక్ట్ ఎస్కేప్ గేట్లు, కాకతీయ కాలువ ద్వారా నీటి విడుదల కొనసాగుతుండటంతో నాలుగు టర్బయిన్ల ద్వారా జెన్ కో అధికారులు కరెంట్ ఉత్పత్తి చేస్తున్నారు.
