అక్షరటుడే, మెండోరా : Sriram Sagar | శ్రీరాంసాగర్ ప్రాజెక్ట్కు (Sriram Sagar Project) ఎగువ నుంచి వరద పోటెత్తుతోంది. దీంతో అధికారులు బుధవారం ఉదయం పదహారు వరద గేట్లను ఎత్తి గోదావరిలోకి నీటి విడుదలను ప్రారంభించారు.
జలాశయంలోకి ప్రస్తుతం 59,654 క్యూసెక్కుల ఇన్ఫ్లో వస్తోంది. దీంతో అంతే మొత్తంలో దిగువకు వరదకు వదులుతున్నారు. ఎస్కేప్ గేట్ల ద్వారా 8 వేల క్యూసెక్కులు, సరస్వతి కాలువకు 650 క్యూసెక్కులు, లక్ష్మి కాలువకు 200, మిషన్ భగీరథకు 231 క్యూసెక్కులు విడుదల చేస్తున్నారు. ఇన్ఫ్లో, ఔట్ఫ్లో సమానంగా ఉండడంతో ప్రాజెక్ట్ నీటిమట్టం నిలకడగా ఉంది. కాకతీయ కాలువకు ప్రస్తుతం నీటి విడుదలను నిలిపేశారు. జలాశయం నీటినిల్వ సామర్థ్యం 80.5 టీఎంసీలు కాగా.. ప్రస్తుతం అంతేస్థాయిలో నీరు నిల్వ ఉంది.
Sriram Sagar | అప్రమత్తంగా ఉండాలి
గోదావరిలోకి (Godavari) నీటి విడుదలను ప్రారంభించడంతో నదీ పరీవాహక గ్రామాల ప్రజలు అప్రమత్తంగా ఉండాలని అధికారులు సూచించారు. మత్స్యకారులు, పశువుల కాపరులు నదిలోకి వెళ్లొద్దన్నారు. గోదావరి పరీవాహక ప్రాంతంలో పొలాలు ఉన్న రైతులు సైతం జాగ్రత్తగా ఉండాలని హెచ్చరించారు. వరద పెరిగితే నీటి విడుదలను పెంచుతామని ప్రాజెక్టు అధికారులు స్పష్టం చేశారు.
Sriram Sagar | నిజాంసాగర్కు పెరుగుతున్న ఇన్ఫ్లో..
అక్షరటుడే, ఎల్లారెడ్డి: Nizam Sagar | నిజాంసాగర్ ప్రాజెక్ట్లోకి (Nizamsagar Project) ఎగువ నుంచి ఇన్ఫ్లో పెరిగింది. జలాశయంలోకి ప్రస్తుతం 9,570 క్యూసెక్కుల వరద వస్తుండగా.. అధికారులు 12 గేట్లకు గాను 2 గేట్లు ఎత్తి దిగువకు నీటిని విడుదల చేస్తున్నారు. ప్రాజెక్ట్ పూర్తిస్థాయి నీటిమట్టం 1405 అడుగులు (17.8 టీఎంసీలు) కాగా.. అంతే మొత్తంలో జలాశయంలో నీటినిల్వ ఉంది. కాగా ఎగువన సింగూరుకు వరద భారీగా వస్తోంది. దీంతో దిగువన నిజాంసాగర్కు నీటి విడుదలను అధికారులు పెంచారు.
Sriram Sagar | పోచారం ప్రాజెక్ట్లోకి..
నాగిరెడ్డిపేట మండలంలోని పోచారం ప్రాజెక్ట్కు (Pocharam Project) ఇన్ఫ్లో క్రమంగా పెరుగుతోంది. చాలా రోజులుల తర్వాత ప్రాజెక్టు అలుగుపై నుంచి నీళ్లు ప్రవహిస్తున్నాయి. ప్రాజెక్ట్ నిండుకుండలా ఉండడంతో వచ్చిన నీరు వచ్చినట్లు అలుగుపై నుంచి పారుతోంది.
