అక్షరటుడే, ఆర్మూర్ : SRSP | శ్రీరామ్ సాగర్ (Sriram Sagar) ప్రాజెక్టుకు ఎగువ నుంచి భారీగా వరద వస్తోంది. దీంతో అధికారులు నీటి విడుదలను పెంచారు. ప్రస్తుతం ప్రాజెక్ట్ 39 వరద గేట్ల ద్వారా 5.96 లక్షల క్యూసెక్కులు దిగువకు విడుదల చేస్తున్నారు.

ప్రాజెక్ట్​కు ఎగువ నుంచి ప్రస్తుతం 4.90 లక్షల క్యూసెక్కుల ఇన్​ఫ్లో వస్తోంది. మహారాష్ట్రతో పాటు స్థానికంగా కురిసిన వర్షాలతో గోదావరి (Godavari) ఉధృతంగా పారుతోంది. మరోవైపు మంజీరకు వరద పోటెత్తడంతో నిజాంసాగర్​ నుంచి నీటి విడుదల కొనసాగుతోంది. దీంతో ఎస్సారెస్పీకి భారీగా వరద వస్తుంది. వరదతో ప్రాజెక్ట్​కు ఇబ్బందులు లేకుండా అధికారులు దిగువకు నీటి విడుదలను పెంచారు.

SRSP | తగ్గుతున్న నీటిమట్టం

ఎస్సారెస్పీ ఇన్​ఫ్లో కంటే ఔట్​ఫ్లో ఎక్కువగా ఉండటంతో ప్రాజెక్ట్​ నీటిమట్టం క్రమంగా తగ్గుతోంది. మొన్నటి వరకు జలాశయంలో పూర్తిస్థాయిలో నీటిని నిల్వ ఉంచిన అధికారులు వదరల దృష్ట్యా నీటి మట్టాన్ని తగ్గించారు. ప్రాజెక్ట్​ పూర్తిస్థాయి నీటినిల్వ సామర్థ్యం 80.5 టీఎంసీలు (1091 అడుగులు ) కాగా ప్రస్తుతం 58.97 టీఎంసీల (1084.70 అడుగులు) నీరు నిల్వ ఉంది.

SRSP | కాలువల ద్వారా..

శ్రీరామ్​సాగర్​ నుంచి ఎస్కేప్​ గేట్ల ద్వారా 8 వేల క్యూసెక్కులు, వరద కాలువ ద్వారా 12,300, మిషన్ భగీరథకు 231 క్యూసెక్కులు వదులుతున్నారు. వర్షాలు పడుతుండటంతో ఆయకట్టుకు నీటి విడుదల నిలిపివేశారు. గోదావరిలోకి భారీగా నీటిని విడుదల చేస్తుండటంతో నది పరీవాహక గ్రామాల ప్రజలు అప్రమత్తంగా ఉండాలని ప్రాజెక్ట్​ ఏఈఈ కొత్తరవి సూచించారు.

SRSP | నీట మునిగిన పొలాలు

శ్రీరామ్​సాగర్​ నుంచి 5.9 లక్షల క్యూసెక్కులు దిగువకు వదులుతున్నారు. దీంతో దిగువన గోదావరి ఉధృతంగా పారుతోంది. నది సమీపంలోని పొలాలను వరద ముంచెత్తింది. దూదిగాం శివారులో పంటలు నీట మునగడంతో రైతులు (Farmers) ఆందోళన చెందుతున్నారు.

SRSP | బాసర వద్ద గోదావరి ఉగ్రరూపం

శ్రీరామ్​సాగర్​ ఎగువన బాసర (Basara) వద్ద గోదావరి ఉధృతంగా ప్రవహిస్తోంది. గోదావరి పుష్కర ఘాట్లతో పాటు, రోడ్డుపై వరకు వరద నీరు వచ్చి చేరింది. వరద మరింత పెరిగితే అమ్మవారి ఆలయం ముందు వరకు వరద చేరే అవకాశం ఉంది.