అక్షరటుడే, వెబ్‌డెస్క్‌: Drone attacks on Russian tankers | నల్ల సముద్రంలో రష్యాకు Russia చెందిన రెండు చమురు ట్యాంకర్లపై వరుస దాడులు చోటుచేసుకున్నాయి.
శుక్రవారం రాత్రి నుంచి శనివారం ఉదయం వరకు గంటల వ్యవధిలో జరిగిన ఈ దాడులతో టర్కీ సముద్రతీర ప్రాంతంలో ఉద్రిక్తత నెలకొంది. దాడుల సమయంలో నల్ల సముద్రం నుంచి “మేడే… మేడే… సాయం కావాలి” అంటూ అత్యవసర సంకేతాలు నమోదైన ఆడియో బయటకు వచ్చింది.
టర్కీ రవాణా శాఖ ప్రకారం, ఈ దాడులు నల్ల సముద్ర తీరం నుంచి సుమారు 35 నాటికల్ మైళ్ల దూరంలో జరిగాయి. శుక్రవారం రాత్రి ‘విరాట్’ పేరుగల రష్యా ట్యాంకర్‌పై, శనివారం తెల్లవారుజామున ‘కైరోస్’ ట్యాంకర్‌పై మానవరహిత ఆయుధాలు (డ్రోన్లు) దాడి చేశాయి.
Drone attacks on Russian tankers | విరాట్‌కు స్వల్ప నష్టం
ప్రమాద హెచ్చరికలు వెలువడిన వెంటనే టర్కీ తీరరక్షక సిబ్బంది చర్యల్లోకి దిగారు. ట్యాంకర్ విరాట్ Virat కుడివైపున స్వల్ప నష్టం జరిగింది. అయినప్పటికీ నౌక స్థిరంగా ఉందని, భద్రతా చర్యలు చేపట్టామని టర్కీ రవాణా మంత్రిత్వ శాఖ ప్రకటించింది.
దాడి కారణంగా కార్యకలాపాలు నిలిచిపోయిన విరాట్‌ను మళ్లీ టర్కీ వైపు లాగి తరలిస్తున్న వీడియోలు కూడా సోషల్ మీడియాలో వైరల్ అయ్యాయి.
కైరోస్ ట్యాంకర్‌పై జరిగిన దాడి తీవ్రంగా నమోదైంది. భారీ పేలుడు సంభవించడంతో మంటలు చెలరేగాయి. అగ్నిమాపక దళం, నేవీ గంటల తరబడి మంటలను ఆర్పి, లోపల చిక్కుకున్న సిబ్బందిని బయటకు తీసేందుకు ప్రయత్నించాయి.
27 మంది సిబ్బందిలో 25 మందిని విజయవంతంగా రక్షించారు. ఈ దాడి టర్కీ తీరానికి 28 నాటికల్ మైళ్ల దూరంలో చోటుచేసుకుంది. కైరోస్, విరాట్.. ఈ రెండు ట్యాంకర్లు 2022లో రష్యా–ఉక్రెయిన్ యుద్ధం ప్రారంభమైన తర్వాత మాస్కోపై విధించిన అంతర్జాతీయ ఆంక్షల జాబితాలో ఉన్నాయనే సమాచారం బయటకు వచ్చింది.
ఈ దాడులను తామే నిర్వహించామని ఉక్రెయిన్ అధికారికంగా ప్రకటించింది. రష్యా ఈ ట్యాంకర్ల ద్వారా నౌకాశ్రయాల నుంచి భారీ స్థాయిలో ఆదాయం సంపాదించి యుద్ధాన్ని కొనసాగిస్తోందని ఆరోపించింది.
అందుకే వీటిని లక్ష్యంగా ఎంచుకున్నామని ఉక్రెయిన్ చెప్పుకొచ్చింది. ఇటీవల రష్యా కూడా ఉక్రెయిన్‌పై భారీ స్థాయిలో దాడులు నిర్వహించింది.
నవంబరు 24న ఒక్క రోజే 22 క్షిపణులు, 460 డ్రోన్లు ప్రయోగించినట్టు నివేదికలు వెల్లడించాయి. ఆ దాడుల్లో 6 మంది మరణించగా, డజన్ల సంఖ్యలో పౌరులు గాయపడ్డారు. దీనికి ప్రతీకారంగా ఉక్రెయిన్ రష్యా రోస్తోవ్ ప్రాంతంపై డ్రోన్ దాడి చేయ‌డంతో ముగ్గురు మరణించారు.
రష్యా దాడుల్లో కీవ్‌లోని పోర్టులు, విద్యుత్, తాగునీటి వ్యవస్థలు తీవ్రంగా దెబ్బతిన్నాయి. అమెరికా అధ్యక్షుడు ట్రంప్ Trump .. రష్యా–ఉక్రెయిన్ యుద్ధం ముగిసేందుకు 28 బిందువుల శాంతి ప్రణాళిక రూపొందించినట్టు సమాచారం.
