అక్షరటుడే, వెబ్డెస్క్: Eagle Team | రాష్ట్రంలో గంజాయి, డ్రగ్స్ వంటి మాదక ద్రవ్యాల వినియోగం విపరీతంగా పెరిగింది. గత పదేళ్లలో రాష్ట్రంలోని మారుమూల ప్రాంతాల్లో సైతం గంజాయి విక్రయాలు పెరిగాయి. గతంలో పెద్ద పెద్ద నగరాలకే పరిమితమైన గంజాయి, డ్రగ్స్ ప్రస్తుతం మారుమూల ప్రాంతాలకు విస్తరించడం తీవ్ర ఆందోళన కలిగిస్తోంది.
ఎంతోమంది యువత వీటికి బానిసలుగా మారి తమ జీవితాలను నాశనం చేసుకుంటున్నారు. అయితే రాష్ట్రాన్ని గంజాయి రహితంగా మార్చడానికి చర్యలు చేపడుతామని ఇటీవల సీఎం రేవంత్రెడ్డి (CM Revanth Reddy) ప్రకటించిన విషయం తెలిసిందే.
ఈ మేరకు ప్రభుత్వం గంజాయి, డ్రగ్స్ Drugs ఆట కట్టించడానికి ఈగల్ వ్యవస్థను ఏర్పాటు చేసింది. ఎక్కడ గంజాయి Ganja కనిపించినా ఈ గద్ద(ఈగల్) వాలిపోతుందని గతంలో సీఎం స్పష్టం చేశారు. ఈ మేరకు ఇటీవల ఈగల్ టీం పోలీసులు (Eagle Team police) హైదరాబాద్ నగరంలో దాడులు చేపడుతున్నారు. గంజాయి, డ్రగ్స్ విక్రేతలు, కొనేవారికి చుక్కలు చూపిస్తున్నారు.
Eagle Team | గచ్చిబౌలిలో బాయ్ బచ్చా ఆగయా..
గచ్చిబౌలి(Gachibowli)లో శుక్రవారం(జులై 18) ఈగల్ టీమ్‌ డెకాయ్ ఆపరేషన్ చేపట్టింది. గంజాయి కొనుగోలు చేస్తుండగా 86 మందిని ఈగల్ టీం పట్టుకొంది. పట్టుబడిన వారిలో సాఫ్ట్‌వేర్‌ ఇంజినీర్లు, రియల్‌ ఎస్టేట్‌ వ్యాపారులు, డెంటల్‌ టెక్నిషియన్స్‌, విద్యార్థులు, మార్కెటింగ్‌ ఉద్యోగులు, హెచ్‌ఆర్‌ మేనేజర్లు ఉన్నారు. ‘బాయ్ బచ్చా ఆగయా’ అంటూ వాట్సాప్‌ గ్రూప్‌ ద్వారా గంజాయి అమ్మకాలు చేపడుతున్నట్లు ఈగల్ టీం గుర్తించింది. గచ్చిబౌలిలో ఇటీవలే 14 మంది పట్టుబడ్డారు.
Eagle Team | ఇటీవలే 14 మంది..
ఈగల్ టీం ఇటీవల కొంపల్లిKompally లోని మల్నాడు రెస్టారెంట్పై (Malnadu restaurant) దాడి చేసి, పెద్ద డ్రగ్స్ రాకెట్ గుట్టు రట్టు చేసిన విషయం తెలిసిందే. ఈ రెస్టారెంట్ యజమాని సూర్య పలువురు పబ్ యజమానులతో కలిసి డ్రగ్స్ దందా చేస్తున్నట్లు గుర్తించి కేసు నమోదు చేశారు. తర్వాత ఈగల్ టీం గచ్చిబౌలిలోనూ డెకాయ్ ఆపరేషన్ నిర్వహించింది. రెండు గంటల వ్యవధిలో 14 మంది గంజాయి వినియోగదారులను పట్టుకుంది. అయితే వీరు కూడా గంజాయి విక్రయించడానికి ‘‘బాయి బచ్చా ఆగయా బాయి’’ అనే కోడ్ భాషను ఉపయోగిస్తున్నట్లు అధికారులు గుర్తించారు.
Eagle Team | ఐటీ కారిడార్లో ఆపరేషన్
మొదట గంజాయి విక్రేతను అరెస్టు చేసిన పోలీసులు.. అతని ఫోన్ నుంచి ‘‘బాయి బచ్చా ఆగయా బాయి’’ అని మేసేజ్ పంపారు. దీంతో గంజాయి కొనుగోలు చేయడానికి 14 మంది వచ్చారు. గచ్చిబౌలి హెచ్డీఎఫ్సీ బ్యాంకు సమీపంలో ఈ ఆపరేషన్ నిర్వహించారు. పట్టుబడిన వారిలో ఎక్కువ మంది 20 ఏళ్లలోపు వారే ఉండటం గమనార్హం. వీరిలో నలుగురు ఐటీ ఉద్యోగులు, ఒక విద్యార్థి, ఒక ట్రావెల్ ఏజెన్సీ యజమాని ఉన్నారు.
Eagle Team | గంజాయి కోసం నాలుగేళ్ల బిడ్డతో..
మొన్న ఈగల్ టీం జరిపిన ఆపరేషన్లో ఓ జంట తమ నాలుగేళ్ల బిడ్డతో కలిసి గంజాయి కొనడానికి వచ్చారు. వారిని చూసి ఈగల్ టీం సభ్యులే షాక్ అయ్యారు. మరో ఇద్దరు దంపతులు సైతం గంజాయి కొనడానికి రాగా.. అధికారులు వారిని అదుపులోకి తీసుకున్నారు.