అక్షరటుడే, వెబ్డెస్క్ : Vice President | ఉపరాష్ట్రపతి అభ్యర్థిని ఎన్డీఏ (NDA) ఖరారు చేసింది. తమిళనాడుకు చెందిన బీజేపీ (Tamil Nadu Bjp) సీనియర్ నాయకుడు సీపీ రాధాకృష్ణన్ పేరును ఖరారు చేసింది. ప్రస్తుతం ఆయన మహారాష్ట్ర గవర్నర్ (Maharashtra Governor )గా పని చేస్తున్నారు. గతంలో తెలంగాణ గవర్నర్ గానూ సేవలందించారు.
జగదీప్ ధన్ఖడ్ రాజీనామా చేయడంతో ఉపరాష్ట్రపతి పదవి ఖాళీ అయింది. దీంతో ఎన్నిక నిర్వహించడానికి ఎన్నికల సంఘం (Election Commission) నోటిఫికేషన్ విడుదల చేసింది. దీని ప్రకారం ఈ నెల 21లోగా నామినేషన్ వేయాల్సి ఉంటుంది. దీంతో ఎన్డీఏ తన అభ్యర్థిని ఖరారు చేసింది. అయితే ఉపరాష్ట్రపతి పదవి రేసులో పలువురు ఉన్నట్లు అనేక పేర్లు వినిపించాయి. కాగా.. ఎన్డీఏ అనుహ్యంగా మహారాష్ట్ర గవర్నర్ సీపీ రాధాకృష్ణన్ (CP Radhakrishnan)ను అభ్యర్థిగా ఖరారు చేసింది.
Vice President | ఆయన నేపథ్యం
రాధాకృష్ణన్ తమిళనాడులోని తిరుప్పూర్లో జన్మించారు. కోయంబత్తూర్ నియోజకవర్గం నుంచి రెండు సార్లు ఎంపీగా గెలిచారు. 1998, 1999 లో ఆయన ఎంపీగా గెలిచారు. 2004, 2014, 2019 ఎన్నికల్లో ఓడిపోయారు. తమిళనాడు బీజేపీ అధ్యక్షుడిగా పనిచేశారు. 2016 నుంచి 2019 వరకు ఆల్ ఇండియా కాయిర్ బోర్డు ఛైర్మన్గా కూడా పని చేశారు.
2023 ఫిబ్రవరి 12న ఆయన జార్ఖండ్ గవర్నర్గా నియమితులయ్యారు. తెలంగాణ గవర్నర్గా ఉన్న తమిళిసై సౌందరరాజన్ 2024 మార్చి 18న రాజీనామా చేయడంతో ఆయనకు అదనపు బాధ్యతలు అప్పగించారు. 2024 జులై 27న మహారాష్ట్ర గవర్నర్గా ఆయన ప్రమాణ స్వీకారం చేశారు.
బీహార్లో ఈ ఏడాది చివరలో అసెంబ్లీ ఎన్నికలు జరగనున్నాయి. దీంతో ఆ రాష్ట్రానికి చెందిన వారికి ఉపరాష్ట్రపతి పదవి ఇస్తారని ప్రచారం జరిగింది. అయితే వచ్చే ఏడాది ఎన్నికలు జరిగే తమిళనాడుకు చెందిన రాధాకృష్ణన్ వైపు బీజేపీ మొగ్గు చూపింది.
