అక్షరటుడే, వెబ్‌డెస్క్‌: Dial 100 : డయల్​ 100 అంటే.. అత్యవసర పరిస్థితులలో పోలీసులను సంప్రదించేందుకు ఉపయోగించే హెల్ప్‌లైన్ నంబరు. దీనికి కాల్​ చేస్తే.. పోలీసులు తక్షణం స్పందిస్తారు. ఆపదలో ఉన్నవారిని ఆదుకునేందుకు చర్యలు తీసుకుంటారు.

కాగా, డయల్​ 100 అంటే ఆకతాయిలకు ఆటలుగా మారింది. ముఖ్యంగా తాగుబోతులు అడ్డగోలుగా వ్యవహరిస్తున్నారు. ఇష్టారీతిన కాల్​ చేస్తూ పోలీసుల విధులకు ఆటంకం కలిగిస్తున్నారు. ఇలాంటి వారిపై పోలీసులు కూడా కఠినంగానే వ్యవహరిస్తున్నారు.

తాజాగా నిజామాబాద్​ జిల్లా (Nizamabad district) ధర్పల్లి పోలీస్​ స్టేషన్​ (​​Dharpalli Police Station) పరిధిలో ఫూటుగా మద్యం తాగి, డయల్​ 100కు కాల్​ చేసి విసిగించిన తాగుబోతుల విషయంలో పోలీసులు కఠినంగా వ్యవహరించారు. ఏకంగా జైలుకే పంపించారు. ఈ ఘటన ద్వారా హెచ్చరికలు జారీ చేశారు.

Dial 100 : మద్యం మత్తులో పలుమార్లు కాల్స్..

ఎసై కళ్యాణి తెలిపిన వివరాల ప్రకారం.. ధర్పల్లి ఠాణా (Police Station) పరిధిలో ఈ నెల (ఆగస్టు) 4వ తేదీన డీబీ తండాకు చెందిన రూప్లా నాయక్​, గణేశ్​ మద్యం తాగి డయల్​ 100కు కాల్​ చేశారు. ఆ రోజు రాత్రి 8:15 గంటలకు, 9:30 గంటలకు, 10 గంటలకు, 11 గంటలకు, 11:30 గంటలకు కాల్​ చేసి పోలీసులను విసిగించారు. డయల్​ 100 ను దుర్వినియోగం చేస్తూ, పోలీసుల విధులకు ఆటంకం కలిగించారు.

ఈ మేరకు పోలీసులు కేసు నమోదు చేసి, నిందితులను కోర్టు ఎదుట హాజరుపర్చారు. బుధవారం సెకండ్​ క్లాస్​ మెజిస్ట్రేట్​ (Second Class Magistrate) నూర్జహాన్​ బేగం కేసు విచారణ చేపట్టారు. సాక్ష్యాధారాలను పరిశీలించిన న్యాయమూర్తి.. నిందితులకు నాలుగు రోజుల జైలు శిక్ష విధిస్తూ తీర్పునిచ్చారు.

Dial 100 : డయల్ 100 యొక్క ఉద్దేశం ఏమిటంటే..

• ఎలాంటి అత్యవసర పరిస్థితిలోనైనా (చోరీ, దాడి, దొంగతనం, అఘటిత ఘటనలు, ప్రమాదాలు) పోలీసుల సాయం కోసం తక్షణమే ఫోన్ చేయొచ్చు.
• ఇది 24×7 సేవలు అందిస్తుంది. పగలు, రాత్రి తేడా లేకుండా ఎప్పుడైనా తక్షణం పోలీసులు స్పందిస్తారు.
• డయల్ 100 కాల్ కు స్పందిస్తూ తక్షణం పోలీస్ పెట్రోలింగ్ వాహనంలో పోలీసులు వచ్చేస్తారు.

Dial 100 : డయల్ 100 దుర్వినియోగం అంటే..

• అవసరం లేకున్నా ఫేక్ కాల్ చేయడం.
• కాల్​ చేసి బూతులు తిట్టడం, ఆటవికంగా మాట్లాడటం, అనవసర సమాచారం ఇవ్వడం.
• సరదా కోసం అబద్ధపు సమాచారం ఇవ్వడం.
• విసిగించేందుకు కాల్ చేయడం.

Dial 100 : దుర్వినియోగానికి పాల్పడితే విధించే శిక్షలు..

భారతీయ శిక్షా సంహిత (IPC) ప్రకారం:

• సెక్షన్ 182 IPC: ప్రభుత్వ అధికారులకు తప్పుడు సమాచారం ఇచ్చారనే అభియోగంపై నిందితులకు జైలు శిక్ష (6 నెలల వరకు) లేదా జరిమానా,  లేదా రెండూ విధించే అవకాశం ఉంది.
• సెక్షన్ 505 (1): ప్రజల్లో గందరగోళం,భయం కలిగించే ప్రయత్నం చేసినందుకు గాను జైలు శిక్ష (3 సంవత్సరాల వరకు) లేదా జరిమానా, లేదా రెండూ కూడా అమలు చేయొచ్చు.
• ఉద్దేశపూర్వకంగా ప్రభుత్వ సర్వీసులను అడ్డుకోవడం : తద్వారా అవసరం ఉన్నవారికి సహాయం అందకుండా చేసి,  ప్రజల ప్రాణాలకు ప్రమాదం కలిగించారనే అభియోగంగా పరిగణిస్తారు. దీనిని అత్యంత తీవ్రమైన చర్యగా పరిగణనలోకి తీసుకుంటారు.