అక్షరటుడే, వెబ్డెస్క్ : Bonalu Festival | హైదరాబాద్– సికింద్రాబాద్ జంట నగరాలు బోనాల పండుగకు (Bonalu Festival) సిద్ధం అయ్యాయి. ఆషాఢ మాసంలో హైదరాబాద్ (Hyderabad) నగరంలో పెద్ద ఎత్తున బోనాలు నిర్వహిస్తారు. గురువారం నుంచి ఆషాఢ మాసం ప్రారంభం కానుంది. దీంతో నెల రోజుల పాటు భాగ్యనగరంలో బోనాల సందడి నెలకొననుంది.
Bonalu Festival | గోల్కొండతో ప్రారంభం
గోల్కొండ (Golconda) కోటలో కొలువైన జగదాంబిక మహంకాళి అమ్మవారికి తొలుత బోనాలు సమర్పిస్తారు. గురువారం నుంచే గోల్కొండ బోనాలు ప్రారంభం అవుతాయి. అయితే జూన్ 29న ఆదివారం పెద్ద ఎత్తున భక్తులు అమ్మవారికి బోనాలు సమర్పించుకొని మొక్కులు చెల్లించుకుంటారు. ఇందులో భాగంగా బుధవారం గోల్కొండ కోటలోని జగదాంబిక మహంకాళి ఆలయానికి భక్తులు పోటెత్తారు. అమ్మవారికి మెట్ల బోనాలు, ఒడి బియ్యం సమర్పించారు.
Bonalu Festival | నగరంలో ఆధ్యాత్మిక సందడి
బోనాల పండుగతో మహా నగరంలో నెల రోజులపాటు ఆధ్యాత్మిక సందడి నెలకొననుంది. గోల్కొండ, సికింద్రాబాద్, లాల్ దర్వజా, ధూల్పేట, బల్కంపేట, పాతబస్తీ, కొత్త బస్తీ అమ్మవారి ఆలయాల్లో బోనాల పండుగను ఘనంగా నిర్వహిస్తారు. అంతేగాకుండా నగరంలోని పలు ఆలయాల్లో కూడా భక్తులు పెద్ద ఎత్తున బోనాలు సమర్పించుకుంటారు. దీంతో అధికారులు ఇప్పటికే ఏర్పాట్లు పూర్తి చేశారు. భక్తులకు ఇబ్బందులు కలుగకుండా సౌకర్యాలు కల్పిస్తున్నారు.
