Betel Leaves | ఆంజనేయ స్వామికి తమలపాకులతో పూజ.. దీని వెనుక దాగి ఉన్న పరమార్థం ఇదే!

అక్షరటుడే, వెబ్‌డెస్క్‌: Betel Leaves | భక్త సులభుడు, కష్టాలను కడతేర్చే కలియుగ దైవం ఆంజనేయ స్వామి. హనుమంతుడికి సిందూరం అన్నా, వనమాల అన్నా ఎంత ప్రీతో.. తమలపాకు మాల అన్నా అంతే ఇష్టం. శని దోషాల నుంచి విముక్తి పొందాలన్నా, తలపెట్టిన కార్యాలు దిగ్విజయంగా పూర్తి కావాలన్నా భక్తులు మంగళ, శనివారాల్లో స్వామికి తమలపాకులతో పూజలు చేస్తుంటారు. అయితే, అంజనీపుత్రుడికి ఈ ఆకు అంటే ఎందుకు అంత ఇష్టం? అసలు ఈ సంప్రదాయం వెనుక ఉన్న రామాయణ గాథ ఏమిటో ఇప్పుడు తెలుసుకుందాం..

Betel Leaves | విజయానికి చిహ్నం:

స్వామికి తమలపాకు మాల ఎందుకు వేస్తారనే విషయం వెనుక ఒక ఆసక్తికరమైన కథ ఉంది. రామరావణ యుద్ధం ముగిసిన తర్వాత, రాముడు విజయం సాధించిన వార్తను సీతమ్మకు తెలియజేయడానికి హనుమంతుడు అశోకవనానికి వెళ్తాడు. ఆ శుభవార్త విన్న సీతమ్మ తల్లి ఆనందానికి అవధులు లేవు. హనుమంతుడికి ఏదైనా బహుమతి ఇవ్వాలని ఆమె చుట్టూ చూస్తుంది. కానీ అక్కడ పూలు లేవు, ఆభరణాలు లేవు. ఆ సమయంలో పక్కనే ఉన్న తమలపాకులను కోసి, వాటిని మాలగా గుచ్చి హనుమంతుడి తలపై పెట్టి, ‘అక్షయుడవు కమ్ము’ అని దీవించింది.

అమ్మ చేతి దీవెనగా ఆ మాలను స్వీకరించిన హనుమంతుడికి ఆ క్షణం నుంచి తమలపాకులు అంటే అమితమైన ఇష్టంగా మారింది. అందుకే విజయానికి సంకేతంగా భక్తులు స్వామికి ఈ మాలను సమర్పిస్తారు.

Betel Leaves | శని దోష నివారణ:

తమలపాకులకు ఉన్న మరో ప్రత్యేకత ఏమిటంటే.. ఇవి విజయాన్ని, ఆరోగ్యాన్ని సూచిస్తాయి. ఆంజనేయుడిని తమలపాకులతో పూజిస్తే శని ప్రభావం తగ్గుతుందని భక్తుల ప్రగాఢ విశ్వాసం. జాతకంలో ఏవైనా దోషాలు ఉన్నా, గ్రహ గతులు అనుకూలించకపోయినా, శనివారం నాడు స్వామికి 108 లేదా 1008 తమలపాకులతో మాల వేసి పూజిస్తే ఆపదలు తొలగిపోతాయని నమ్ముతారు.

ఆరోగ్య రహస్యం: ఆధ్యాత్మికంగానే కాకుండా, తమలపాకులకు శాస్త్రీయంగా కూడా ఎంతో ప్రాముఖ్యం ఉంది. తమలపాకు జీర్ణశక్తిని పెంచుతుంది, శరీరంలోని విషతుల్యాలను తొలగిస్తుంది. హనుమంతుడికి తమలపాకు మాల వేసిన తర్వాత, ఆ ఆకును ప్రసాదంగా స్వీకరించడం వల్ల ఆరోగ్యం మెరుగుపడుతుందని ఆయుర్వేదం చెబుతోంది. ముఖ్యంగా మనసును ప్రశాంతంగా ఉంచే గుణం దీనికి ఉంది.

ఎప్పుడు, ఎలా సమర్పించాలి?

మంగళవారం: గ్రహ దోషాల నివారణకు, ధైర్యం కోసం.

శనివారం: శని దోషాల నుంచి ఉపశమనం కోసం, కార్యసిద్ధి కోసం.

తమలపాకు మాలను సమర్పించేటప్పుడు ఆకులు తాజాగా ఉండాలి. ఆకులపై చందనంతో ‘రామ’ నామం రాసి సమర్పిస్తే స్వామి మరింత త్వరగా ప్రసన్నుడవుతాడు.

హనుమంతుడిని తమలపాకులతో పూజించడం అంటే.. కేవలం ఆచారం మాత్రమే కాదు, అది విజయానికి ఆశీర్వచనం. భక్తితో సమర్పించే ఒక చిన్న ఆకు, జీవితంలోని పెద్ద కష్టాలను సైతం తొలగిస్తుందని భక్తుల నమ్మకం.