అక్షరటుడే, వెబ్డెస్క్ : America | అగ్రరాజ్యం అమెరికాలో మరోసారి తుపాకుల మోత మోగింది. ఓ వ్యక్తి రెస్టారెంట్ (Restaurant)పై కాల్పులకు పాల్పడ్డాడు. ఈ ఘటనలో ముగ్గురు మృతి చెందారు.
అమెరికాలోని నార్త్‌ కరోలినా (North Carolina)లో యూఎస్ (US) కాలమానం ప్రకారం శనివారం రాత్రి కాల్పులు చోటు చేసుకున్నాయి. రాత్రి 9:30 గంటల ప్రాంతంలో విల్మింగ్టన్‌కు దక్షిణంగా 20 మైళ్ల దూరంలో ఉన్న సౌత్‌పోర్ట్ యాచ్ బేసిన్ ప్రాంతంలోని అమెరికన్ ఫిష్ కంపెనీ రెస్టారెంట్లో కాల్పులు జరిగాయి. గుర్తు తెలియని వ్యక్తి బోటులో వచ్చి కాల్పులకు పాల్పడ్డాడు. అనంతరం అదే బోటులో పారిపోయాడు. కాగా ఈ ఘటనలో ముగ్గురు మృతి చెందగా పలువురు తీవ్రంగా గాయపడ్డారు. సమాచారం అందుకున్న పోలీసులు ఘటన స్థలానికి చేరుకొని పరిశీలించారు. క్షతగాత్రులను ఆస్పత్రులకు తరలించారు. నిందితుడి కోసం గాలిస్తున్నట్లు పోలీసులు తెలిపారు.
America | ఏడుగురిపై కాల్పులు
దుండగుడు ఏడుగురిపై కాల్పులకు తెగబడ్డాడు. ఈ ఘటనలో ముగ్గురు అక్కడికక్కడే మృతి చెందారు. మిగతా వారిని ఆస్పత్రికి తరలించారు. ఒక పడవ రెస్టారెంట్ వద్దకు వచ్చిన తర్వాత అందులోని వ్యక్తి వేగంగా వెళ్లి జనంపై కాల్పులు జరపడం ప్రారంభించినట్లు నగర మేనేజర్ నోహ్ సాల్డో ధృవీకరించారు. ప్రజలు ఆ ప్రాంతానికి దూరంగా ఉండాలని, ఇళ్ల నుంచి బయటకు రావొద్దని అధికారులు సూచించారు. ఏదైనా అనుమానాస్పద కార్యకలాపాలు జరిగితే వెంటనే 911 కు ఫోన్ చేయాలన్నారు.
కాగా ఇటీవల అమెరికాలో కాల్పుల ఘటనలు పెరగడం ఆందోళన కలిగిస్తోంది. మూడు రోజుల క్రితం డల్లాస్‌ (Dallas)లోని యూఎస్ ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్ ఫీల్డ్ ఆఫీస్ వద్ద కాల్పులు చోటు చేసుకున్నాయి. ఈ ఘటనలో ఓ వ్యక్తి మృతి చెందగా, ఇద్దరు తీవ్రంగా గాయపడ్డారు.
