అక్షరటుడే, వెబ్డెస్క్ : America | అమెరికా (America) మరో సంచలన నిర్ణయం తీసుకుంది. వలస కార్మికుల వర్క్ పర్మిట్ల ఆటోమేటిక్ రెన్యువల్ విధానాన్ని రద్దు చేసింది. ఈ మేరకు డిపార్ట్మెంట్ ఆఫ్ హోమ్ల్యాండ్ సెక్యూరిటీ (Department of Homeland Security) ప్రకటన విడుదల చేసింది.
అమెరికా అధ్యక్షుడిగా రెండో సారి బాధ్యతలు చేపట్టిన తర్వాత వలసదారులపై ట్రంప్ (Donald Trump) కఠిన చర్యలు చేపడుతున్న విషయం తెలిసిందే. మొదట్లో అక్రమ వలసదారులపై ఆయన ఉక్కుపాదం మోపారు. అమెరికాలో అక్రమంగా నివసిస్తున్న వారిని గుర్తించి వారి దేశాలకు పంపించారు. అనంతరం ఆయన వలసదారులపై ఆంక్షలు అమలు చేస్తున్నారు. ఇప్పటికే హెచ్–1బీ వీసా (H-1B Visa) ఫీజు భారీగా పెంచిన ట్రంప్ తాజాగా.. ఉపాధి అధికార పత్రాల (EAD) యొక్క ఆటోమేటిక్ పొడిగింపును నిలిపి వేశారు. వేలాది మంది విదేశీ ఉద్యోగులపై దీని ప్రభావం పడనుంది. అందులో ఎక్కువ మంది ప్రవాస భారతీయులు ఉంటారు.
America | ఈ రోజు నుంచే..
ఈ ఏడాది అక్టోబర్ 30 (గురువారం) లేదా ఆ తర్వాత తమ EADని పునరుద్ధరించడానికి దాఖలు చేసే విదేశీయులు ఆటోమేటిక్ పొడిగింపును పొందరు అని డిపార్ట్మెంట్ ఆఫ్ హోమ్ల్యాండ్ సెక్యూరిటీ పేర్కొంది. అక్టోబర్ 30కి ముందు స్వయంచాలకంగా పొడిగించబడిన వర్క్ పర్మిట్లు ప్రభావితం కావు. కొత్త నిబంధనతో ప్రజా భద్రత, జాతీయ భద్రతను కాపాడటానికి తనిఖీ మరియు స్క్రీనింగ్ ఎక్కువగా ఉంటుంది అని తెలిపింది.
America | తీవ్ర ప్రభావం..
బైడెన్ అధ్యక్షుడిగా ఉన్న కాలంలో వర్క్ పర్మిట్ (Work Permit) గడువు ముగిసిన తర్వాత కూడా 540 రోజులు పని చేయడానికి అనుమతిస్తూ ఉత్తర్వులు జారీ చేశారు. దీంతో ఆటోమేటిక్గా వర్క్ పర్మిట్ రెన్యువల్ అయ్యేది. తాజాగా విధానానికి ముగింపు పలుకుతూ ట్రంప్ సర్కారు కొత్త నిబంధనలు తీసుకు వచ్చింది. వర్క్ పర్మిట్ పొడిగింపు కోసం.. వలసదారులు ఇక నుంచి ముందుగానే దరఖాస్తు చేసుకోవాల్సి ఉంటుంది. అనంతరం అధికారులు పరిశీలించి అన్ని సక్రమంగా ఉంటే.. వర్క్ పర్మిట్ పొడిగిస్తారు. లేదంటే తిరస్కరిస్తారు. వలస కార్మికుల నేపథ్యాన్ని సమీక్షించడం కోసం ఈ నిబంధనకు అవసరమని US ప్రభుత్వం చెబుతోంది. తమ EAD గడువు ముగియడానికి 180 రోజుల ముందు పునరుద్ధరణ కోసం దరఖాస్తు చేసుకోవాలని సూచించింది. ఆలస్యంగా దరఖాస్తు చేస్తే వారికే నష్టం వాటిల్లుతుందని, తాత్కాలికంగా పని అనుమతులను కోల్పోయే ప్రమాదం ఉందని పేర్కొంది.
