అక్షరటుడే, వెబ్డెస్క్ : Minister Azharuddin | మంత్రి అజారుద్దీన్కు ప్రభుత్వం శాఖలు కేటాయించింది. మైనారిటీల సంక్షేమం, ప్రభుత్వ సంస్థలు కేటాయిస్తూ ఉత్తర్వులు జారీ చేసింది.
ఇటీవల అజారుద్దీన్ (Minister Azharuddin) మంత్రిగా ప్రమాణ స్వీకారం చేసిన విషయం తెలిసిందే. ఆయన జూబ్లీహిల్స్ టికెట్ ఆశించారు. అయితే కాంగ్రెస్ ప్రభుత్వం గవర్నర్ కోటాలో గతంలో ఎమ్మెల్సీగా ఎంపిక చేసింది. అయితే ఆ నియామకానికి ఇంకా గవర్నర్ ఆమోదం తెలుపలేదు. జూబ్లీహిల్స్ ఉప ఎన్నికల నేపథ్యంలో ప్రభుత్వం ఆయనకు ఇటీవల మంత్రి పదవి ఇచ్చింది. ఆ నియోజకవర్గంలో మైనారిటీ ఓట్లు అధికంగా ఉంటాయి. దీంతో ఇప్పటికే ఎంఐఎం మద్దతు తీసుకున్న కాంగ్రెస్.. ఆ వర్గం ఓట్ల కోసం అజారుద్దీన్కు మంత్రి పదవి ఇచ్చింది.
Minister Azharuddin | హైదరాబాద్ నుంచి తొలిమంత్రి
తెలంగాణ (Telangana)లో కాంగ్రెస్ ప్రభుత్వం ఏర్పాటు అయిన నాటి నుంచి ఉమ్మడి రంగారెడ్డి, హైదరాబాద్ జిల్లాలకు మంత్రి పదవి దక్కలేదు. రెండో సారి మంత్రి వర్గ విస్తరణ చేపట్టిన సమయంలో తనకు పదవి ఇవ్వాలని ఇబ్రహీంపట్నం ఎమ్మెల్యే మల్రెడ్డి రంగారెడ్డి అడిగారు. అయితే ఆ సమయంలో సామాజిక సమీకరణలో ఆయనకు పదవి దక్కలేదు. తాజాగా జూబ్లీహిల్స్ ఎన్నిక (Jubilee Hills Election) నేపథ్యంతో ప్రభుత్వం హైదరాబాద్ నగరానికి చెందిన అజారుద్దీన్కు పదవి ఇచ్చింది. అయితే ఆరు నెలలలోపు ఆయన ఎమ్మెల్సీ, లేదా ఎమ్మెల్యేగా ప్రమాణం చేయాల్సి ఉంటుంది. ప్రస్తుతం ఎమ్మెల్సీ నియామకం గవర్నర్ దగ్గర పెండింగ్లో ఉంది.
Minister Azharuddin | అజారుద్దీన్ నేపథ్యం
మహమ్మద్ అజారుద్దీన్ హైదరాబాద్ (Hyderabad)లో జన్మించాడు. భారత జాతీయ క్రికెట్ జట్టు కెప్టెన్‌గా పని చేశాడు. ఇండియా తరఫున 99 టెస్ట్ మ్యాచ్‌లు, 334 వన్డే ఇంటర్నేషనల్స్ ఆడాడు. మ్యాచ్ ఫిక్సింగ్ ఆరోపణలతో బీసీసీఐ అతడిపై జీవిత కాల సస్పెన్షన్ విధించింది. దీంతో 2000లో అతని క్రికెట్ కెరీర్ ముగిసింది. అయితే నిషేధంపై ఆయన హైకోర్టును ఆశ్రయించగా.. 2012లో జీవితకాల నిషేధాన్ని ఎత్తివేసింది. క్రికెట్ నుంచి తప్పుకున్న తర్వాత అజారుద్దీన్ కాంగ్రెస్ పార్టీ (Congress Party)లో చేరారు. 2009లో యూపీలోని మొరాదాబాద్ నుంచి ఎంపీగా గెలుపొందారు. 2014లో రాజస్థాన్‌ నుంచి పోటీ చేసి ఓడిపోయారు. అనంతరం 2023 అసెంబ్లీ ఎన్నికల్లో జూబ్లీహిల్స్ నుంచి పోటీ చేసి పరాజయం పాలయ్యారు.
