అక్షరటుడే, వెబ్డెస్క్: AI Summit Protest | ఢిల్లీ (Delhi)లో జరిగిన ఏఐ ఇంపాక్ట్ సమిట్లో యూత్ కాంగ్రెస్ నేతలు చొక్కాలు విప్పి నిరసనలు తెలిపిన విషయం తెలిసిందే. దీంతో ఈ ఘటన దేశ వ్యాప్తంగా రాజకీయంగా తీవ్ర దుమారం రేపుతోంది.
అయితే ఘటనకు సంబంధించి ఢిల్లీ యూత్ కాంగ్రెస్ అధ్యక్షుడు (Delhi Youth Congress President) ఉదయ్ భాను చిబ్ను పోలీసులు అరెస్టు చేశారు. దీంతో కేసులో ఇప్పటివరకు అరెస్టయిన వారి సంఖ్య ఎనిమిది మందికి చేరుకుంది.
AI Summit Protest |దాదాపు 20 గంటల పాటు విచారణ
ఏఐ ఇంపాక్ట్ సమిట్ (AI Impact Summit) వద్ద నిరసనలపై పోలీసులు ఉదయ్ భానును దాదాపు 20 గంటలపాటు విచారించినట్లు అధికార వర్గాలు తెలిపాయి. అనంతరం ఆయనను అరెస్టు చేసినట్లుగా వెల్లడించాయి. నిరసనలకు సంబంధించి ఆయన కీలక పాత్ర పోషించినట్లుగా ఆధారాలు గుర్తించామని పోలీసులు పేర్కొన్నారు. అరెస్ట్ అనంతరం నిందితుడిని ఢిల్లీ పాటియాలా హౌస్ కోర్టు (Delhi Patiala House Court)లో హాజరుపర్చారు. అతడికి ఏడు రోజుల పాటు కస్టడీకి ఇవ్వాలని కోరారు. కాగా.. దేశంలోని వివిధ ప్రాంతాలకు సంబంధించిన వ్యక్తులు నిరసనల్లో పాల్గొన్నట్లు తెలుస్తోంది. అయితే ఇరు పక్షాల వాదనలు విన్న కోర్టు.. యూత్ కాంగ్రెస్ నాయకుడికి నాలుగు రోజుల కస్టడీ విధించింది.
