అక్షరటుడే, వెబ్​డెస్క్: Passport seva kendram | రాష్ట్రంలో మరో పాస్​పోర్ట్​ సేవా కేంద్రం ప్రారంభమైంది. దేశంలోనే తొలిసారి మెట్రో స్టేషన్​ లోపల పాస్​పోర్టు సేవా కేంద్రాన్ని హైదరాబాద్​లో ఏర్పాటు చేశారు.

నగరంలోని ఎంజీబీఎస్​ మెట్రో స్టేషన్ (MGBS Metro Station) లోపల పాస్‌పోర్ట్ సేవా కేంద్రాన్ని మంత్రి పొన్నం ప్రభాకర్​ (Minister Ponnam Prabhakar) మంగళవారం ప్రారంభించారు. దీంతో రాష్ట్రంలోని పాస్​పోర్టు కేంద్రాల సంఖ్య ఐదుకు చేరుకుంది. బేగంపేటలో ప్రధాన కార్యాలయం ఉంది. తాజాగా ఎంజీబీఎస్​లో సేవా కేంద్రం ఏర్పాటు చేశారు. వీటితో పాటు టోలిచౌకి (రాయదుర్గం), నిజామాబాద్, కరీంనగర్​లో సైతం పాస్​పోర్టు సేవా కేంద్రాలు ఉన్నాయి. వీటి ద్వారా రాష్ట్రంలో నిత్యం 4,500 పాస్‌పోర్ట్‌లను జారీ చేయొచ్చు. కాగా గతంలో అమీర్​పేటలో ఉన్న పాస్​పోర్టు సేవా కేంద్రాన్నే (passport service center) ఎంజీబీఎస్​కు మార్చారు. టోలిచౌకిలో ఉన్న కేంద్రాన్ని సైతం రాయదుర్గం ప్రాంతానికి తరలించారు.

Passport seva kendram | పారదర్శకంగా సేవలు

మంత్రి పొన్నం ప్రభాకర్​ మాట్లాడుతూ.. మెట్రో స్టేషన్, బస్ స్టాండ్ కాంప్లెక్స్​లో పాస్ పోర్టు కేంద్రం ఏర్పాటు చేయడం దేశంలో ఇదే మొదటి సారి అని చెప్పారు. వేగంగా, పారదర్శకంగా పాస్ పోర్టును అందించేందుకు దీనిని ప్రారంభించామన్నారు. అధికారులు నిబంధనల మేరకు వేగంగా పాస్​పోర్టులు జారీ చేయాలని ఆయన సూచించారు.

Passport seva kendram | డిమాండ్​ పెరగడంతో..

నగరంలోని పాతబస్తీలో పాస్ పోర్టు జారీ కేంద్రం (passport issuance center) ఏర్పాటు చేయాలని కొంతకాలంగా డిమాండ్ ఉంది. దీంతో పాత బస్తీలోని ప్రజల అవసరాల మేరకు దీనిని ఏర్పాటు చేసినట్లు మంత్రి పొన్నం తెలిపారు. హైదరాబాద్​ ఎంపీ అసదుద్దీన్​ ఒవైసీ మాట్లాడుతూ.. పాస్​పోర్టు సేవా కేంద్రం ఏర్పాటు చేయడం వ్యక్తిగతంగా తనకు చాలా ఉపశమనం కలిగించే విషయమన్నారు. కార్యాలయాన్ని ప్రారంభించడానికి తాము ఎంతో కృషి చేశామని ఆయన గుర్తు చేసుకున్నారు. ఈ కార్యక్రమంలో రాజ్యసభ సభ్యుడు అనిల్​ కుమార్​ యాదవ్​, మేయర్​ విజయలక్ష్మి, హైదరాబాద్​ కలెక్టర్​ హరిచందన తదితరులు పాల్గొన్నారు.