అక్షరటుడే, వెబ్డెస్క్: Krishna River | ఆంధ్రప్రదేశ్ ప్రభుత్వం మరో విజన్ ప్రాజెక్ట్‌కు శ్రీకారం చుట్ట‌బోతుంది. అమరావతి రాజధాని నగరం నుంచి విజయవాడ-హైదరాబాద్ జాతీయ రహదారిని అనుసంధానించేలా కృష్ణా నదిపై (Krishna River) ఐకానిక్ వంతెన నిర్మించాలని నిర్ణయించింది.
ఈ ప్రతిష్టాత్మక ప్రాజెక్టు కోసం ప్రభుత్వం ఇప్పటికే నాలుగు ప్రత్యేక డిజైన్లు సిద్ధం చేయించింది. ప్రజలు తమకు నచ్చిన డిజైన్‌కు ఓటు వేయగలిగేలా అవకాశం కల్పించడం ప్రత్యేక ఆకర్షణగా మారింది. ఈ నాలుగు డిజైన్లలో మూడు కూచిపూడి నాట్యకళను ప్రతిబింబించేలా ఉంటే, మరొకటి ఆంగ్ల అక్షరం ‘A’ ఆకారంలో ఉండి, అమరావతి వైభవాన్ని చాటేలా రూపొందించారు. వంతెన నిర్మాణాన్ని ఇంజినీరింగ్, ఆర్ట్, హెరిటేజ్ మేళవింపుగా తీర్చిదిద్దే ప్రయత్నం చేయడం ఈ ప్రాజెక్ట్‌ ప్రత్యేకత.
Krishna River | రాయపూడి నుంచి మూలపాడు వరకు..
వంతెన రాయపూడి నుంచి మూలపాడు వరకు, సుమారు 5 కిలోమీటర్ల పొడవుతో నిర్మించనున్నారు. ఇది కేవలం ట్రాన్స్‌పోర్ట్ కనెక్షన్ మాత్రమే కాకుండా, టూరిజం హబ్‌గా (Tourism Hub) కూడా అభివృద్ధి చేయాలన్నది ప్రభుత్వ లక్ష్యం. ఈ నాలుగు డిజైన్లలో మీకు నచ్చిన డిజైన్‌కు ఓటు వేయాలంటే, మీరు CRDA అధికారిక వెబ్‌సైట్‌కు వెళ్లాలి. అక్కడ మీ పేరు, ఫోన్ నంబర్ నమోదు చేసి, ఒక డిజైన్‌ను ఎంచుకోవచ్చు. తర్వాత క్యాప్చా ఎంటర్ చేసి, ఓటు వేయవచ్చు. ఓ చారిత్రాత్మక నిర్మాణంలో జన భాగస్వామ్యాన్ని నిరూపించేందుకు ఇది గొప్ప అవకాశంగా మారింది.
వంతెన నిర్మాణం ప్రాజెక్టు ప్రస్తావన సందర్భంగా మంత్రి పొన్నాడ నారాయణ మాట్లాడుతూ.. “అమరావతిని వచ్చే మూడు సంవత్సరాల్లో పూర్తి చేస్తాం. వాస్తవిక నగరంగా అభివృద్ధి చేస్తాం” అని అన్నారు. అమరావతి (Amaravati) డెవలప్‌మెంట్‌లో భాగంగా ఈ బ్రిడ్జి కీలకమైన ప్రాజెక్టుగా మారనుంది. ఇతర అభివృద్ధి ప్రణాళికలలో భాగంగా, నక్ష (జియోస్పేషియల్ ఆధారిత భూ సర్వే) కార్యక్రమాన్ని మరింత సమర్థవంతంగా అమలు చేయడానికి రాష్ట్ర ప్రభుత్వం (State Government) రాష్ట్ర, పట్టణ స్థాయి కమిటీలను ఏర్పాటు చేసింది. ఈ కమిటీల ద్వారా భూ సమాచారం మరింత ఖచ్చితంగా రికార్డు చేయాలని లక్ష్యంగా పెట్టుకుంది. ఇంకెందుకు ఆలస్యం ? మీరు కూడా ఓటు వేసి, ఈ చారిత్రాత్మక నిర్మాణంలో భాగస్వాములు కావచ్చు.
