అక్షరటుడే, బాన్సువాడ: Heavy rains | జిల్లాలో రేపటి నుంచి భారీ వర్షాలు కురిసే అవకాశం ఉందని వాతావరణ శాఖ (Meteorological Department) హెచ్చరించిందని బాన్సువాడ సబ్కలెక్టర్ (Banswada Sub-Collector Kiranmai) కిరణ్మయి పేర్కొన్నారు. ప్రజలంతా అప్రమత్తంగా ఉండాలని సూచించారు. ఈ మేరకు సోమవారం ప్రకటన విడుదల చేశారు.
డివిజన్లోని అధికారులంతా అప్రమత్తంగా ఉండాలని సూచించారు. ఎలాంటి అవాంఛనీయ సంఘటనలు జరగకుండా ముందస్తు జాగ్రత్త తీసుకోవాలని పేర్కొన్నారు. డివిజన్లో అధిక వర్షాల వల్ల కలిగిన ఇబ్బందులను దృష్టిలో పెట్టుకొని మళ్లీ భారీ వర్షాలు కురిస్తే గ్రామస్థాయి నుంచి డివిజన్ స్థాయి వరకు అధికారులు క్షేత్రస్థాయిలో చురుగ్గా వ్యవహరించాలన్నారు.
ముంపునకు గురయ్యే ప్రాంతాలు, అధికంగా ఓవర్ఫ్లో అయ్యే ప్రాజెక్టులు, చెరువులు, ప్రమాదకరంగా ప్రవహించే వాగులు, వంకలు వైపు ప్రజలు వెళ్లకుండా చూడాలని సబ్ కలెక్టర్ పేర్కొన్నారు. పాత ఇళ్లు, భవనాలు, ప్రమాదకరంగా ఉన్న విద్యుత్ స్తంభాలు తదితర అన్ని ప్రాంతాలను గుర్తించి ముందస్తుగా ప్రజలను అప్రమత్తం చేయాలని ఆమె స్పష్టం చేశారు.
గ్రామాలు, మండలాలు, మున్సిపాలిటీల వారీగా ఎప్పటికప్పుడు పరిస్థితులను డివిజన్, జిల్లాస్థాయిలో అధికారులకు తెలియజేయాలన్నారు. ప్రజలు కూడా అప్రమత్తంగా ఉండి జిల్లా అధికార యంత్రాంగానికి సహకరించాలని సూచించారు. చేపల వేటకు వెళ్లేవారు, పశువులు, గొర్రెల కాపరులు నీటి పరీవాహక ప్రాంతాల్లో అధికారుల సూచనల మేరకు తగు జాగ్రత్తలు తీసుకోవాలని సూచించారు.