అక్షరటుడే, వెబ్​డెస్క్ : BC Reservations | బీసీ రిజర్వేషన్లపై అన్ని పార్టీల నేతలతో సోమవారం గవర్నర్​ జిష్ణుదేవ్​ వర్మను (Governor Jishnu Dev Verma) కలుస్తామని మంత్రి పొన్నం ప్రభాకర్ (Ponnam Prabhakar)​ తెలిపారు. స్థానిక ఎన్నికల్లో బీసీ రిజర్వేషన్లు కల్పించే బిల్లుకు అసెంబ్లీ ఆమోదం తెలిపింది.

స్థానిక సంస్థల్లో బీసీలకు 42శాతం రిజర్వేషన్​ కల్పిస్తామని కాంగ్రెస్​ హామీ ఇచ్చిన విషయం తెలిసిందే. అయితే గతంలో పంపిన బిల్లులకు కేంద్రం ఆమోదం తెలుపలేదు. ఆర్డినెన్స్​ తీసుకు రాగా గవర్నర్​ సంతకం చేయలేదు. దీంతో పంచాయతీరాజ్​ చట్టంలో సవరణలు చేసి బీసీ రిజర్వేషన్లు (BC Reservations) అమలు చేసేలా ప్రభుత్వం ఆదివారం అసెంబ్లీలో బిల్లు ఆమోదించింది.

BC Reservations | మా విధానం చెప్తాం

బీసీ రిజర్వేషన్ల బిల్లుపై చర్చించేందుకు రాష్ట్రపతి ద్రౌపది ముర్ము (President Draupadi Murmu), ప్రధాని మోదీ (PM Modi) అపాయింట్‌మెంట్ ఇవ్వడం లేదని పొన్నం ప్రభాకర్​ అన్నారు. దీంతో గవర్నర్‌ను కలిసి పరిస్థితిని వివరిస్తామన్నారు. ఈ మేరకు ఆయన ఆదివారం అసెంబ్లీ వద్ద మాట్లాడారు. రాష్ట్రంలో స్థానికంగా జరిగే ఎన్నికలపై రాష్ట్రాలు నిర్ణయం తీసుకునే అవకాశం ఉందని గవర్నర్​ దృష్టికి తీసుకు వెళ్తామన్నారు. తమ విధానం చెబుతామని.. అయితే నిర్ణయం గవర్నర్‌దేనని ఆయన పేర్కొన్నారు.

BC Reservations | రిజర్వేషన్లతోనే ఎన్నికలు

బీసీలకు 42శాతం రిజర్వేషన్లు అమలు చేశాకే  స్థానిక ఎన్నికలకు వెళ్తామని మంత్రి పొన్నం ప్రభాకర్ (Minister Ponnam Prabhakar)​ తెలిపారు. సెప్టెంబర్‌ 30 లోపు స్థానిక సంస్థల ఎన్నికలు నిర్వహిస్తామన్నారు. గవర్నర్​ను కలవడానికి అన్ని పార్టీల నేతలు రావాలని ఆయన కోరారు. అయితే గవర్నర్​ బీసీ రిజర్వేషన్లను ఆమోదిస్తారా లేదా అనే ఉత్కంఠ నెలకొంది. ఒకవేళ ఆమోదించకుంటే స్థానిక ఎన్నికలు ఎలా నిర్వహిస్తారని ప్రజలు చర్చించుకుంటున్నారు.