అక్షరటుడే, వెబ్​డెస్క్ : Reservations | బీసీ రిజర్వేషన్లపై (BC Reservations) కాంగ్రెస్​కు చిత్తశుద్ధి లేదని మెదక్​ ఎంపీ రఘునందన్​రావు (MP Raghunandan Rao) అన్నారు. స్థానిక ఎన్నికల్లో రిజర్వేషన్ల పరిమితిని ఎత్తివేస్తూ మంత్రివర్గం నిర్ణయం తీసుకున్న విషయం తెలిసిందే.

కేబినెట్​ నిర్ణయంపై ఎంపీ రఘునందన్​రావు స్పందించారు. సీలింగ్‌ ఎత్తివేతపై ప్రభుత్వం అవగాహన లేకుండా ముందుకెళ్తోందని విమర్శించారు. ఈ విషయంలో సుప్రీం, హైకోర్టు తీర్పులు పరిగణనలోకి తీసుకోలేదన్నారు. సెప్టెంబర్​ 30లోపు సర్పంచ్​ ఎన్నికలు నిర్వహించాలని హైకోర్టు ఆదేశించడంతో.. హడావుడిగా ప్రభుత్వం ఈ నిర్ణయం తీసుకుందని విమర్శించారు. న్యాయపరంగా ఇది నిలబడే అవకాశం లేదని ఆయన పేర్కొన్నారు.

Reservations | కాంగ్రెస్​దే బాధ్యత

బీసీ రిజర్వేషన్లపై కాంగ్రెస్‌కు అవగాహన లేదని బీజేపీ ఎమ్మెల్యే పాయల్​ శంకర్​ (Payal Shankar) అన్నారు. ప్రత్యేక జీవోలతో బీసీ రిజర్వేషన్లు సాధ్యం కాదని పేర్కొన్నారు. రిజర్వేషన్ల సీలింగ్​ ఎత్తివేత నిర్ణయంతో న్యాయపరంగా వచ్చే అడ్డంకులకు కాంగ్రెస్​దే బాధ్యత అన్నారు. 42 శాతం బీసీ రిజర్వేషన్లతోనే స్థానిక ఎన్నికలు (Local Body Elections) నిర్వహించాలని ఆయన డిమాండ్​ చేశారు.

Reservations | బిల్లు ప్రవేశపెట్టనున్న ప్రభుత్వం

స్థానిక సంస్థల ఎన్నికల నిర్వహణకు ప్రభుత్వం సిద్ధం అవుతోంది. అయితే 42 శాతం బీసీ రిజర్వేషన్ల అంశం కొలిక్కిరాకపోవడంతో జాప్యం జరుగుతోంది. ఈ క్రమంలో తాజాగా పంచాయతీ రాజ్​ చట్టంలో రిజర్వేషన్ల సీలింగ్​ 50 శాతం మించకూడదనే నిబంధనను ఎత్తివేయాలని ప్రభుత్వం నిర్ణయించింది. దీంతో బీసీలకు 42శాతం రిజర్వేషన్లు అమలు చేయాలని భావిస్తోంది.

రిజర్వేషన్లు 50 శాతానికి మించకూడదని గతంలో సుప్రీంకోర్టు స్పష్టం చేసింది. తాజాగా కేబినెట్​ నిర్ణయం కోర్టులో నిలబడే అవకాశం లేదని బీజేపీ నేతలు అంటున్నారు. మరోవైపు రిజర్వేషన్ల బిల్లులను గతంలో ఆర్డినెన్స్‌ ద్వారా గవర్నర్‌కు పంపామని మంత్రి పొంగులేటి శ్రీనివాస్​రెడ్డి తెలిపారు. ఆదివారం అసెంబ్లీలో బిల్లు ప్రవేశ పెట్టి ఆమోదిస్తామన్నారు.