అక్షరటుడే, వెబ్డెస్క్ : Rajnath Singh | అమెరికా టారిఫ్‌ల నేప‌థ్యంలో ఉద్రిక్త ప‌రిస్థితులు నెల‌కొన్న త‌రుణంలో కేంద్ర రక్షణ శాఖ మంత్రి రాజ్‌నాథ్‌సింగ్ (Rajnath Singh) కీల‌క వ్యాఖ్య‌లు చేశారు. దేశాల‌కు శాశ్వ‌త మిత్రులు, శాశ్వ‌త శ‌త్రువులు ఉండ‌ర‌ని, కేవ‌లం దేశ శాశ్వ‌త ప్ర‌యోజ‌నాలు మాత్రమే ముఖ్య‌మ‌ని పేర్కొన్నారు.
ఇండియా ఎప్పుడూ ఎవ‌రినీ శ‌త్రువుగా ప‌రిగ‌ణించ‌ద‌ని, రైతులు, చిరు వ్యాపారుల ప్ర‌యోజ‌నాలే ల‌క్ష్యంగా ప‌ని చేస్తుంద‌ని చెప్పారు. శ‌నివారం ఎన్డీటీవీ నిర్వ‌హించిన డిఫెన్స్ స‌మ్మిట్‌లో (Defense Summit) ప్ర‌సంగించిన ఆయన.. ప్ర‌పంచం చాలా వేగంగా మారుతోందని, కొత్త స‌వాళ్లు త‌లెత్తుతున్నాయ‌ని, వాటికి అనుగుణంగానే కేంద్ర ప్ర‌భుత్వం (Central Government) నిర్ణ‌యం తీసుకుంటుంద‌ని తెలిపారు.
Rajnath Singh | స్వావలంబన అత్యావ‌క‌శ్యం..
ప్ర‌పంచంలో కొత్త స‌వాళ్లు ఎదుర‌వుతున్న నేప‌థ్యంలో ఆత్మనిర్భరత (స్వావలంబన) అత్యావ‌కశ్య‌మ‌ని రాజ్‌నాథ్ అన్నారు. మహమ్మారి, ఉగ్రవాదం లేదా ప్రాంతీయ సంఘర్షణలు అయినా, ఈ శతాబ్దం ఇప్పటివరకు ప్రతి రంగంలోనూ అత్యంత సంక్లిష్ట‌త‌లు, స‌వాళ్లు ఎదుర‌య్యాయ‌న్నారు. ఇటువంటి పరిస్థితులలో నేటి వ్యూహాత్మక అవసరాల గురించి ఆత్మనిర్భరత (స్వావలంబన) ఒక ప్రయోజనం మాత్రమే కాదు, అది ఒక అవసరంగా మారిందన్నారు. రక్షణ రంగంలో ఇత‌రుల‌పై ఆధారపడటం ఇకపై మనకు ఒక ఎంపిక కాదని.. మారుతున్న భౌగోళిక రాజకీయాలు స్పష్టం చేస్తున్నాయ‌న్నారు. ప్రస్తుత పరిస్థితులలో మన ఆర్థిక వ్యవస్థ, మన భద్రత రెండింటికీ స్వావలంబన చాలా అవసరమని నొక్కి చెప్పారు.
Rajnath Singh | రక్షణ ఎగుమ‌తుల్లో రికార్డు..
2014లో మన రక్షణ ఎగుమతి రూ. 700 కోట్ల కంటే తక్కువగా ఉందని, ఇప్పుడ‌ది దాదాపు రూ. 24,000 కోట్లకు పెరిగి రికార్డు స్థాయికి చేరుకుందని రాజ్‌నాథ్ తెలిపారు. భారతదేశం ఇకపై కొనుగోలుదారు మాత్రమే కాదని, ఎగుమతిదారుగా మారుతోందని ఇది చూపిస్తుందన్నారు. మన దళాలు స్వదేశీ పరికరాలతో లక్ష్యాలపై ఖచ్చితమైన దాడులు చేసిన విధానం మన దార్శనికతకు నిద‌ర్శ‌న‌మ‌న్నారు. దీర్ఘకాలిక తయారీ, సమన్వయం లేకుండా ఏ మిషన్ కూడా విజయవంతం కాదని గుర్తు చేశారు. ఆపరేషన్ సిందూర్ సమయంలో ఉపయోగించిన ఆయుధాలు, సైనిక ఆస్తులు, ఆ తర్వాత పాక్‌తో దాదాపు 100 గంటల పాటు జరిగిన సైనిక వివాదం, “దార్శనికత, దీర్ఘకాలిక తయారీ” అవసరాన్ని నొక్కిచెప్పాయని రాజ్‌నాథ్ సింగ్ అన్నారు.
Rajnath Singh | ఇండియాలోనే యుద్ధ‌నౌక‌ల తయారీ..
భారత యుద్ధనౌకలు (Indian Warships) స్థానికంగానే తయారవుతున్నాయ‌ని రక్షణ మంత్రి తెలిపారు. ప్రపంచ ఆర్థిక, భౌగోళిక రాజకీయ సవాళ్ల మధ్య దేశ సైనిక ప్రొఫైల్, శక్తిని పెంచడానికి ‘ఆత్మనిర్భర్ భారత్’ వైపు కొత్త పురోగతిని నొక్కి చెప్పారు. ఆయుధాలు, సెన్సార్ వ్యవస్థలలో గణనీయమైన నవీకరణలతో పూర్తి స్థాయి సముద్ర కార్యకలాపాలను అమలు చేయగల సామర్థ్యం కలిగిన నీలగిరి-తరగతి స్టెల్త్ యుద్ధనౌకలు INS హిమగిరి, INS ఉదయగిరి యుద్ధ నౌక‌ల‌ను స్థానికంగానే త‌యారుచేసిన‌ట్లు గుర్తు చేశారు.