అక్షరటుడే, వెబ్​డెస్క్​: Maxwell | ఆస్ట్రేలియా విధ్వంసకర బ్యాట్స్‌మెన్ గ్లెన్ మ్యాక్స్‌వెల్ (Maxwell) వన్డే క్రికెట్‌కు వీడ్కోలు పలికిన విష‌యం తెలిసిందే. 2023 ప్రపంచ కప్ గెలిచిన ఆసీస్ జట్టులో సభ్యుడైన మ్యాక్స్‌వెల్ కొద్ది రోజుల క్రితం వ‌న్డేల‌కు గుడ్​బై చెబుతూ టీ20 ఫార్మాట్‌లో మాత్రం కొనసాగుతున్న‌ట్లు చెప్పాడు. అయితే సౌతాఫ్రికాతో జ‌రిగిన మ్యాచ్‌లో మ్యాక్సీని గెలిపించి త‌నలో స‌త్తా చావ‌లేద‌ని నిరూపించాడు. సౌతాఫ్రికాతో జరిగిన మూడు టీ20ల సిరీస్‌ను ఆస్ట్రేలియా 2-1తో సొంతం చేసుకుంది. శనివారం జరిగిన చివరి మ్యాచ్‌లో మ్యాక్స్‌వెల్ సూపర్​ ఇన్నింగ్స్ ఆడి ఆసీస్‌ను గెలిపించాడు.

Maxwell | అద‌రగొట్టే బ్యాటింగ్..

ఈ మ్యాచ్‌లో గ్లెన్ మ్యాక్స్‌వెల్ 36 బంతుల్లో 8 ఫోర్లు, 2 సిక్స్‌లతో 62 నాటౌట్‌గా నిలిచాడు. ఫస్ట్​ బ్యాటింగ్ చేసిన సౌతాఫ్రికా 20 ఓవర్లలో 7 వికెట్లకు 172 పరుగులు చేసింది. బ్రెవిస్ 26 బంతుల్లో 53, వాన్ డెర్ డస్సెన్ 38 నాటౌట్, స్టబ్స్ 25 (23 బంతుల్లో 2 ఫోర్లు) రన్స్​ చేశారు. ఆసీస్ బౌలింగ్ చూస్తే.. నాథన్ ఎల్లిస్ 3/31, హజెల్‌వుడ్ 2/30, ఆడమ్ జంపా 2/24 అద్భుత‌మైన బౌలింగ్‌తో సౌతాఫ్రికాను (South Africa) క‌ట్టడి చేశారు. ఇక ఛేజింగ్‌లో ఆసీస్ 19.5 ఓవర్లలో 8 వికెట్లు కోల్పోయి టార్గెట్​ను ఛేదించింది. మార్ష్ 54, మ్యాక్స్‌వెల్ 62 నాటౌట్ రాణించారు. సౌతాఫ్రికా బౌల‌ర్స్‌లో కోర్బిన్ బోచ్ 3/26, రబాడా 2/32, మఫకా 2/36తో రాణించారు.

అయితే చివ‌రి ఓవ‌రు ఉత్కంఠ‌భ‌రితంగా మారింది. విజయానికి చివరి 12 బంతుల్లో 12 పరుగులు అవసరమవగా, కోర్బిన్ బోచ్ 19వ ఓవర్లో రెండు వికెట్లు తీసి కేవలం రెండు పరుగులు మాత్రమే ఇచ్చాడు. దీంతో చివరి ఓవర్​లో ఆసీస్‌కు ఇంకా 10 రన్స్​ అవసరముండగా, మ్యాక్స్‌వెల్ ఒత్తిడిని జ‌యించాడు. లుంగి ఎంగిడి వేసిన 20వ ఓవర్ లో ఒకటో బంతికి 2 పరుగులు రాగా, రెండో బంతి ఫోర్, 3, 4 డాట్, 5వ బంతికి ఫోర్ కొట్ట‌డంతో ఆసీస్ విజ‌యం సాధించింది. మ్యాక్స్‌వెల్ ఇన్నింగ్స్ మ్యాచ్‌కు ముగింపు పలుకుతూ, అభిమానులకు అలుపెరగని ఉత్సాహాన్ని అందించింది.