అక్షరటుడే, వెబ్డెస్క్ : Devotional | శ్రావణ మాసం అంటేనే పండుగలకు, పూజలకు నెలవు. ఆధ్యాత్మికత ఉట్టిపడే ఈ మాసంలో వచ్చే ప్రతి శుక్రవారం విశేషమే. అయితే, ఈసారి వరలక్ష్మీ వ్రతం (Varalakshmi Vratham) మరింత ప్రత్యేకంగా నిలవనుంది. శ్రావణ పౌర్ణమికి ముందు వచ్చే ఈ శుక్రవారం నాడు, సాధారణంగా వరలక్ష్మీ వ్రతం జరుపుకుంటారు. ఈ సంవత్సరం ఆగస్టు 8న ఈ వ్రతం రాగా, ఆ రోజున ఒక అరుదైన యోగం కలిసి రావడం భక్తులలో ఆనందాన్ని నింపుతోంది.
Devotional | వరలక్ష్మీ వ్రతం రోజున కుబేరుడి నక్షత్రం
సాధారణంగా శ్రీ మహా విష్ణువు(Sri Maha Vishnuvu)కు ప్రీతిపాత్రమైన శ్రవణ నక్షత్రం పేరు మీద ఈ మాసానికి శ్రావణ మాసం అని పేరు వచ్చింది. అయితే, ఈసారి వరలక్ష్మీ వ్రతం జరుపుకునే రోజున ఉత్తరాషాఢ నక్షత్రం ఉంది. ఈ నక్షత్రం ధనానికి అధిపతి అయిన కుబేరుడి నక్షత్రం (Kubera Nakshatram). ఒకవైపు లక్ష్మీదేవి పూజ, మరోవైపు కుబేరుడి నక్షత్రం కలసి రావడం వల్ల ఇది అత్యంత అరుదైన యోగంగా పండితులు చెబుతున్నారు. ఈ యోగం వల్ల లక్ష్మీదేవి(Lakshmi Devi) అనుగ్రహంతో పాటు, ధనానికి అధిపతి అయిన కుబేరుడి అనుగ్రహం కూడా లభిస్తుంది.
Devotional | ఆర్థిక సమస్యల నుంచి విముక్తి..
కుటుంబంలో ఆర్థిక సమస్యలు, ఇతర ఇబ్బందులతో బాధపడేవారు ఈ ప్రత్యేకమైన రోజున వరలక్ష్మీ వ్రతం చేయడం వల్ల అద్భుతమైన ఫలితాలు పొందుతారు. అమ్మవారి ఆశీస్సులతో సమస్యల నుంచి బయటపడతారని ప్రగాఢ విశ్వాసం. కాబట్టి ఈరోజున ఉదయాన్నే నిద్ర లేచి, తలస్నానం చేసి పరిశుభ్రమైన వస్త్రాలు ధరించాలి. లక్ష్మీదేవికి అత్యంత ప్రీతిపాత్రమైన పసుపు రంగు చీరను ధరించి పూజ చేయడం శుభప్రదం.
Devotional | పూజా విధానం, నైవేద్యం
వరలక్ష్మీ వ్రతానికి కలశం ప్రతిష్టించడం చాలా ముఖ్యం. కొందరు అమ్మవారి ఫోటోను ఉంచి పూజిస్తే, మరికొందరు అమ్మవారి ప్రతిమను ప్రతిష్టించి పూజలు చేస్తారు. పూజకు ముందుగా ఇంటిని శుభ్రం చేసి, ముగ్గులు వేసి అలంకరించాలి. పూలు, పండ్లతో పాటు ధూప, దీప నైవేద్యాలను సమర్పించాలి. నైవేద్యంగా ముఖ్యంగా చక్కెర పొంగలి, పులిహోర, శనగలు వంటివి పెడతారు. ఈ నైవేద్యాలు అమ్మవారికి అత్యంత ఇష్టమైనవిగా భావిస్తారు.
Devotional | శుభ ముహూర్తం
వరలక్ష్మీ వ్రతానికి ఉదయం ఐదు గంటల నుంచి తొమ్మిది గంటల వరకు అత్యంత శుభసమయమని పండితులు చెబుతున్నారు. ఈ సమయంలో పూజ చేస్తే అమ్మవారి కరుణ సులభంగా లభిస్తుందని నమ్ముతారు. ఉదయం సమయం దాటిన తర్వాత కూడా పూజ చేయవచ్చు, కానీ ఉదయం పూట చేసే పూజకు విశేషమైన ఫలితాలు ఉంటాయని శాస్త్రాలు చెబుతున్నాయి. ఈ ప్రత్యేకమైన రోజును సద్వినియోగం చేసుకొని, వరలక్ష్మీదేవి అనుగ్రహాన్ని పొందవచ్చు.