అక్షరటుడే, వెబ్డెస్క్ : Fake Attendance | గ్రామ పంచాయతీల్లో పాలన వ్యవహారాలను చూసుకోవడంలో పంచాయతీ కార్యదర్శులది కీలక పాత్ర. కార్యదర్శులు సమయానికి గ్రామానికి చేరుకోవాలని ప్రభుత్వం ఆదేశాలు జారీ చేసింది. అయితే చాలా మంది ఇష్టం వచ్చినప్పుడు జీపీ కార్యాలయాలకు వస్తున్నారు. దీంతో ప్రభుత్వం ఫేసియల్ రికగ్నిషన్(Facial Recognition) ద్వారా హాజరు నమోదు చేయాలని ఆదేశించింది. మొబైల్ నుంచి యాప్ ద్వారా జీపీ కార్యాలయం(GP Office)లో అటెండెన్స్ నమోదు చేయాల్సి ఉంటుంది. అయితే కొంతమంది జీపీ కార్యదర్శులు ఫేక్ అటెండెన్స్(Fake Attendance) పెట్టి మోసాలకు పాల్పడినట్లు అధికారులు గుర్తించారు.
Fake Attendance | చర్యలు తీసుకోవాలని మంత్రి ఆదేశం
కొంతమంది కార్యదర్శులు విధులు నిర్వహించకుండా ఫేక్ అటెండెన్స్తో జీతాలు తీసుకుంటున్నట్లు ప్రభుత్వం గుర్తించింది. అలాంటి వారిపై కఠిన చర్యలు చేపట్టాలని మంత్రి సీతక్క(Minister Seethakka) ఆదేశించారు. కార్యదర్శులు తాము పని చేస్తున్న గ్రామం నుంచే మొబైల్ ఫేషియల్ రికగ్నిషన్ యాప్ ద్వారా అటెండెన్స్ నమోదు చేసుకోవాల్సి ఉంటుంది. అయితే కొంతమంది ఫోన్లను పంచాయతీ కార్మికులకు ఇచ్చి తాము లేకుండానే అటెండెన్స్ నమోదు చేయిస్తున్నారు.
Fake Attendance | పాస్పోర్టు ఫొటోలు పెట్టి..
కొంత మంది జీపీ కార్యదర్శులు పంచాయతీ సిబ్బందికి తమ ఫోన్లు, పాస్పోర్టు సైజ్ ఫొటోలు ఇచ్చి అటెండెన్స్ నమోదు చేయిస్తుండటం గమనార్హం. కొందరైతే ఖాళీ కుర్చీలను యాప్ ఫొటోలు తీసి యాప్లో పెడుతున్నారు. ఒక్కో జిల్లాలో పదుల కొద్ది ఇలాంటి వారు ఉన్నట్లు అధికారులు గుర్తించారు. జగిత్యాల జిల్లాలో అయితే ఓ కార్యదర్శి సీఎం రేవంత్రెడ్డి(CM Revanth Reddy) ఫొటో అప్లోడ్ చేయడం గమనార్హం. గతంలో సైతం జీపీఎస్ ఆధారిత అటెండెన్స్ సిస్టమ్ ఉండగా.. ఫేక్ జీపీఎస్ లోకేషన్ల(Fake GPS Locations)తో కొందరు కార్యదర్శులు మోసాలకు పాల్పడ్డారు. దీంతో ప్రభుత్వం ఫేక్ రికగ్నిషన్ యాప్ తీసుకొచ్చింది. అయినా ఫేక్ అటెండెన్స్ పెట్టి విధులకు డుమ్మా కొడుతున్నారు.
Fake Attendance | పట్టించుకోని అధికారులు
పంచాయతీ కార్యదర్శుల విధులను పర్యవేక్షించాల్సిన ఎంపీవోలు, ఎంపీడీవోలు పట్టించుకోవడం లేదనే విమర్శలు ఉన్నాయి. గ్రామాలకు తనిఖీలకు వచ్చిన సమయంలో పలువురు ఎంపీవో(MPO)లు, ఎంపీడీవో(MPDO)లు కార్యదర్శుల నుంచి డబ్బులు తీసుకుంటున్నట్లు ఆరోపణలు ఉన్నాయి. తనిఖీకి వచ్చినప్పుడు దావత్, డబ్బులు ఇస్తే తర్వాత వారు ఏం చేస్తున్నారనే విషయాలను కూడా పట్టించుకోవడం లేదు. ఫేక్ అటెండెన్స్పై ప్రభుత్వం సీరియస్ కావడంతో వారిని సస్పెండ్ చేయాలని డీపీవోలకు ఉన్నతాధికారులు ఆదేశాలు జారీ చేశారు.
