అక్షరటుడే, వెబ్డెస్క్: Kapil Sharma | కెనడా (Canada)లో మరోసారి ఖలిస్థానీ తీవ్రవాదులు రెచ్చిపోయారు. కొంతకాలంగా కెనడా కేంద్రంగా ఖలిస్థానీ మద్దతుదారులు ఆందోళన కార్యక్రమాలు చేపడుతున్న విషయం తెలిసిందే. గతంలో మోదీ పర్యటన సందర్భంగా వీరు నిరసన కూడా చేపట్టారు. అయితే తాజాగా ప్రముఖ కమెడియన్ కపిల్ శర్మ (Kapil Sharma) కేఫ్పై వీరు కాల్పులు జరిపారు.
కపిల్ శర్మ కేఫ్ ఇటీవల కెనడాలో కేఫ్ ప్రారంభించారు. ఆయన ప్రారంభించిన కొద్ది రోజులకే కాల్పులు చోటు చేసుకోవడం గమనార్హం. గురువారం ఆయన కేఫ్పై తొమ్మిది రౌండ్ల కాల్పులు జరిపారు. ఖలిస్తానీ(Khalistani) ఉగ్రవాది హర్జీత్ సింగ్ లడ్డీ ఈ ఘటనకు బాధ్యత వహించాడు. అయితే ఈ కాల్పుల్లో ఎవరూ గాయపడలేదు.
లడ్డీ NIA మోస్ట్ వాంటెడ్ ఉగ్రవాదులలో ఒకడు. కపిల్ శర్మ గతంలో చేసిన వ్యాఖ్యల నేపథ్యంలో ప్రతీకారంతో కాల్పులకు ఆదేశించినట్లు తెలుస్తోంది. కాల్పుల అనంతరం పోలీసులు, ఫోరెన్సిక్ బృందాలు ఘటన స్థలానికి చేరుకొని పరిశీలించాయి. కాగా లడ్డీ గతంలో పంజాబ్లో వీహెచ్పీ (VHP) నాయకుడు వికాస్ ప్రభాకర్ అలియాస్ వికాస్ బగ్గా హత్య కేసులో నిందితుడు. ఆ ఉగ్రవాదిని అప్పగించాలని ఎన్ఐఏ కొంతకాలంగా కెనడా ప్రభుత్వాన్ని కోరుతోంది.
కెనడాలో భారత వ్యతిరేక కార్యకలాపాలు జోరుగా సాగుతున్నాయి. ముఖ్యంగా ఖలిస్థానీ ఉగ్రవాదులు కెనడా కేంద్రంగా భారత్లో విధ్వంసాలకు ప్రణాళికలు రూపొందిస్తున్నారు. కెనడ గత ప్రధాని ట్రూడో ఖలిస్థానీలకు మద్దతుగా ఉన్నారు. అంతేగాకుండా ఖలిస్థానీ ఉగ్రవాదిని గుర్తు తెలియని వ్యక్తులు కాల్చి చంపితే భారత్ చేసినట్లు ఆరోపించారు. అనంతరం భారత్, కెనడా మధ్య సంబంధాలు క్షీణించాయి. అయితే కెనడా కొత్త ప్రధానిగా మార్క్ కార్నే (Mark Carney) వచ్చిన తర్వాత రెండు దేశాల మధ్య సంబంధాలు మెరుగు పడుతున్నాయి. ఇటీవల కెనడా వేదికగా జరిగిన జీ 7 సదస్సుకు కార్నే ప్రధాని మోదీని ఆహ్వానించిన విషయం తెలిసిందే.
