అక్షరటుడే, వెబ్డెస్క్:Israel – Iran | ఇరాన్లోని అణుస్థావరాలే లక్ష్యంగా గురువారం రాత్రి ఇజ్రాయెల్(Israel) దాడులకు పాల్పడిన విషయం తెలిసిందే. ఆపరేషన్ రైజింగ్ లయన్ పేరిట చేపట్టిన ఈ దాడుల్లో ఇరాన్కు తీవ్ర నష్టం కలిగింది. ఈ దాడుల్లో ఇరాన్ పారామిలిటరీ రెవెల్యూషనరీ గార్డు చీఫ్ మేజర్ హొస్సేన్ సలామీ(Hussain Salami) కూడా మరణించారు. ఈ దాడులపై స్పందిస్తూ అమెరికా అధికారులు తమ ప్రమేయం లేదని చెప్పారు.
అయితే ఇజ్రాయెల్ దాడులకు ముందు అమెరికా అధ్యక్షుడు డోనాల్డ్ ట్రంప్ (US President Donald Trump) చేసిన పోస్ట్ వైరల్గా మారింది. ఇరాన్ రాజధాని టెహ్రన్(Tehran)పై ఇజ్రాయెల్ విరుచుకుపడింది. అణుస్థావరాలను ధ్వంసం చేసింది. అయితే ఈ దాడికి కొన్ని గంటల ముందు అమెరికా అధ్యక్షుడు ట్రంప్ సోషల్ మీడియాలో పోస్ట్ చేశారు. ఇరాన్ గొప్ప దేశమే కావొచ్చు.. కానీ అణ్వాయుధాలు కలిగి ఉండాలనే ఆశను వదులుకోవాలని అందులో పేర్కొన్నారు. ఇరాన్ న్యూక్లియర్ సమస్యను దౌత్య మార్గాల ద్వారా పరిష్కరించుకోవాలని సూచించారు. కాగా.. ఆయన పోస్టు పెట్టిన కొన్ని గంటలకే ఇజ్రాయెల్ దాడులకు పాల్పడడం గమనార్హం.
Israel – Iran | ఇరుదేశాల్లో అప్రమత్తత
దాడుల అనంతరం ఇరాన్, ఇజ్రాయెల్ దేశాలు అప్రమత్తంగా ఉన్నాయి. ఇప్పటికే ఇజ్రాయెల్ తమ గగనతలాన్ని మూసివేసింది. ఆ దేశంలో అత్యవసర పరిస్థితిని విధించింది. మరోవైపు తాము చేసిన దాడులకు ఇరాన్(Iran) ప్రతిదాడులు చేయవచ్చని ఇజ్రాయెల్ అధికారులు తెలిపారు. అందుకు తాము సిద్ధంగా ఉన్నట్లు వారు పేర్కొన్నారు. దీంతో మరో యుద్ధం ప్రారంభం అవుతుందేమోనని ప్రపంచ దేశాలు ఆందోళన చెందుతున్నాయి.
