అక్షరటుడే, లింగంపేట : Lingampet | తన తల్లిని కాదని మరో పెళ్లి చేసుకోవడానికి సిద్ధమైన తండ్రిని కుమారుడు దారుణంగా హత్య చేశాడు. ఈ ఘటన లింగంపేట(Lingampet ) మండలం అయ్యపల్లితండా(Ayyapalli thandaలో శనివారం రాత్రి చోటు చేసుకుంది. పోలీసులు తెలిపిన వివరాల ప్రకారం.. అయ్యపల్లి తండాకు చెందిన దేవ సోత్ ఫకీరాకు(46)కు పంగీ అనే మహిళతో 25 ఏళ్ల క్రితం వివాహం అయింది. వీరికి కుమారుడు ప్రకాశ్​ నాయక్​, కూతురు ఉన్నారు. కూతురికి పెళ్లి చేశారు.

ఫకీరా పర్మల్ల తండాకు చెందిన ఓ మహిళను రెండో పెళ్లి చేసుకోవాలని అనుకున్నాడు. అయితే దీనికి కుమారుడు వ్యతిరేకించాడు. పెళ్లీడుకు వచ్చిన కుమారుడు ఉండగా.. రెండో పెళ్లి ఎందుకుని ఇంట్లో కొద్ది రోజులుగా గొడవలు జరుగుతున్నాయి. ఈ క్రమంలో పలుమార్లు పంచాయితీలు జరగ్గా తండావాసులు, బంధువులు సర్ది చెప్పారు. అయితే శనివారం రాత్రి సైతం తండ్రి కొడుకులు మరోసారి గొడవ పడ్డారు.

ఈ క్రమంలో ఇటీవల కొత్తగా నిర్మించిన ఇంటిని గ్యాస్​ సిలిండర్​కు నిప్పు అంటించి పేల్చేస్తా అని ఫకీరా అన్నాడు. దీంతో ఆవేశానికి గురైన ఆయన కుమారుడు ప్రకాశ్​ గొడ్డలితో తండ్రిని నరికాడు. తీవ్రంగా గాయపడ్డ ఫకీరా అక్కడికక్కడే మృతి చెందాడు. సమాచారం అందుకున్న పోలీసులు ఘటన స్థలానికి చేరుకొని పరిశీలించారు. నిందితుడిని అదుపులోకి తీసుకొని విచారిస్తున్నట్లు ఏఎస్సై ప్రకాష్ నాయక్ తెలిపారు.