అక్షరటుడే, వెబ్​డెస్క్ : Parking Space | హైదరాబాద్ (Hyderabad)​ నగరంలో ట్రాఫిక్​ కష్టాలు అన్ని ఇన్ని కావు. నగరం రోజు రోజుకు విస్తరిస్తుండటంతో రద్దీ కూడా పెరుగుతోంది. ముఖ్యంగా బయటకు వెళ్లిన సమయంలో పార్కింగ్​ (Parking)కు స్థలాలు లేక నగరవాసులు ఇబ్బందులు పడుతున్నారు. తమ వాహనాలను రోడ్లపై నిలుపుతున్నారు. దీంతో ట్రాఫిక్​ జామ్ (Traffic Jam)​ అవుతోంది. కుటుంబంతో సరదాగా బయటకు వెళ్లి తమ బండ్లను ఎక్కడ నిలపాలో తెలియక అవస్థలు పడుతున్నారు. ఈ క్రమంలో నగరవాసుల పార్కింగ్​ కష్టాలు తీరేలా అధికారులు చర్యలు చేపట్టారు. ఈ మేరకు నాంపల్లిలో 15 అంతస్తుల భవనంలో పార్కింగ్​ కోసం ఏర్పాట్లు చేశారు.

నాంపల్లిలో ప్రభుత్వ, ప్రైవేట్​ భాగస్వామ్యంతో 15 అంతస్తుల భవనం నిర్మిస్తున్నారు. దీనిని నోవమ్ కంపెనీ నిర్మిస్తుండగా.. హైదరాబాద్​ మెట్రో రైల్​ లిమిటెడ్​ (HMRL) పర్యవేక్షిస్తోంది. ఈ భవనంలో 10 అంతస్తులను పార్కింగ్​ కోసం వినియోగించనున్నారు. ఐదు అంతస్తులను కమర్షియల్ స్పేస్​ కోసం అద్దెకు ఇస్తారు. ఈ భవనం పనులు దాదాపుగా పూర్తయ్యాయి. త్వరలో పది భవనంలో పార్కింగ్​ వ్యవస్థ అందుబాటులోకి వస్తుందని హైదరాబాద్ మెట్రో రైలు మేనేజింగ్ డైరెక్టర్ ఎన్వీఎస్ రెడ్డి తెలిపారు. ఆదివారం ఆయన భవనంలో పనులను పరిశీలించారు. పలు ప్రభుత్వ శాఖల నుంచి అనుమతులు రావాల్సి ఉందన్నారు. పర్మిషన్లు వచ్చాక.. భవనాన్ని అందుబాటులోకి తెస్తామన్నారు.

Parking Space | ఆటోమేటెడ్ పార్కింగ్ వ్యవస్థ

ఇది ప్రపంచ స్థాయి ప్రాజెక్ట్ అని, నాంపల్లి (Nampalli) ప్రాంతంలోని పార్కింగ్ సమస్య పరిష్కారానికి ఉపయోగ పడుతుందని ఎన్వీఎస్​ రెడ్డి అన్నారు. కాగా ఈ భవనంలో జర్మన్ (German) పాలిస్ టెక్నాలజీని ఉపయోగించి పూర్తిగా ఆటోమేటెడ్ పజిల్ పార్కింగ్ వ్యవస్థ అందుబాటులోకి తేనున్నారు. భారత్​లో ఈ రకం పార్కింగ్ వ్యవస్థ హైదరాబాద్​లోనే మొదట అందుబాటులోకి రానుంది. ఈ కాంప్లెక్స్​లో 10 పార్కింగ్ అంతస్తులు (3 బేస్‌మెంట్‌లు, 7 పై అంతస్తులు) ఉంటాయి. మరో ఐదు అంతస్తులను వాణిజ్య కార్యకలాపాల కోసం కేటాయించనున్నారు. 11వ అంతస్తులో సినిమా థియేటర్లు, సిటీ-వ్యూ గ్యాలరీ ఏర్పాటు చేస్తారు.

Parking Space | 250 కార్లు.. 200 బైక్​లు

ఈ భవనంలో మొత్తం 250 కార్లు, 200 ద్విచక్ర వాహనాలను పార్క్​ చేయొచ్చు. మానవ ప్రమేయం లేకుండా సెన్సార్ల సాయంతో ఆటోమేటిక్​గా పార్కింగ్​ చేసేలా రూపొందించారు. కారు లోనికి తీసుకెళ్లడానికి కార్డు స్వైప్​ చేయాలి. అనంతరం కారును టర్న్ టేబుల్‌పై ఉంచి, హ్యాండ్‌బ్రేక్‌ను వేస్తే ఆటోమేటిక్​గా పార్కింగ్​ అయిపోతుంది.